Nagavci sqaron pozicionin e VV-së: Do ta votojmë ndryshimin e Ligjit për Gjykatën Speciale, por bindja jonë mbetet e pandryshuar

Shefja e Grupit Parlamentar të Lëvizjes Vetëvendosje, Arbërie Nagavci, ka bërë të ditur se subjekti i saj politik do t’i japë mbështetjen e nevojshme nismës për ndryshimin e Ligjit për Dhomat e Specializuara dhe Zyrën e Prokurorit të Specializuar. Megjithatë, ajo ka sqaruar se ky votim nuk do të thotë në asnjë mënyrë se partia e saj ka lëvizur nga pozicioni i saj historik ndaj këtij institucioni të drejtësisë, të cilin Vetëvendosje e ka kundërshtuar që në ditët e para të themelimit. “Kur Qeveria dhe Kuvendi i Kosovës morën një prej vendimeve më të rënda institucionale të pasluftës, atëherë duhej të përcaktoheshin me shumë më tepër largpamësi natyra, mandati dhe kufijtë e mekanizmit që po krijohej, si dhe pasojat që ai mund të kishte për vendin dhe kombin tonë. Ne ishim kundër krijimit të Dhomave të Specializuara. Qëndrimi ynë nuk ka ndryshuar për këtë Gjykatë Speciale. Kemi menduar atëherë dhe mendojmë edhe sot se çdo dyshim për vepra penale të kryera nga individë duhej të hetohej dhe gjykohej brenda sistemit të rregullt të drejtësisë së Republikës së Kosovës. Drejtësia ishte e domosdoshme, ndërsa një sistem i veçantë drejtësie për Kosovën, ku do të gjykohej lufta, sipas nesh, nuk ishte”, ka deklaruar ajo. Sipas shpjegimeve të Nagavcit, autoritetet qeveritare dhe shumica e deputetëve në vitin 2015 patën zgjedhur një rrugë tjetër, duke sjellë ndryshimin e Kushtetutës, miratimin e ligjit përkatës për Dhomat e Specializuara dhe ratifikimin e marrëveshjes ndërkombëtare. Pavarësisht kësaj kornize, ajo ka theksuar se Lëvizja Vetëvendosje do t'i bashkohet përpjekjeve për ndryshimin e këtij ligji, duke argumentuar se një veprim që ajo e cilëson si të gabuar në origjinë nuk duhet të shërbejë si pengesë për ndërhyrjet korrigjuese. Në vijim të fjalës së saj, Nagavci ka specifikuar qartë se këto ndryshime ligjore nuk do të kenë ndikim në lirimin e ish-krerëve të Ushtrisë Çlirimtare të Kosovës që tashmë janë dënuar nga ky mekanizëm gjyqësor. “Nuk po e përmendim këtë sot për t’u ndarë sërish mes nesh si dikur, por sepse nuk mund të kuptohet vendimi që po e marrim pa kujtuar vendimin prej të cilit ai buron. Njëmbëdhjetë vjet më vonë, reagimi është i vonuar dhe zgjidhjet e propozuara janë të nxituara. Kjo duhet thënë në përgjithësi, pikërisht sepse momenti është i rëndësishëm”, ka thënë Nagavci. Ajo ka shtuar se nëse faktorët politikë që në vitin 2015 e mbështetën këtë zgjidhje tani shprehin vullnetin për ta korrigjuar atë përmes ndryshimeve ligjore, Vetëvendosje do të jetë aty për ta përkrahur këtë nismë. “Jo sepse kemi ndryshuar qëndrimin tonë, por sepse bindjen se një vendim ka qenë i gabuar dhe i dëmshëm nuk mund ta përdorim si arsye për të penguar korrigjimin e asaj që ende mund të korrigjohet. Duhet ndërkaq të jemi të vetëdijshëm për kufijtë e këtij vendimi. Kosovës i duhet një strategji shtetërore”, ka përfunduar ajo.