Ndryshimet në Ligjin për Specialen, Nagavci: Vetëvendosje do t'i japë mbështetjen

Shefja e Grupit Parlamentar të Lëvizjes Vetëvendosje, Arbërie Nagavci, ka deklaruar se tematika që po trajtohet në seancën e sotme parlamentare duhej të merrte zgjidhje qysh në vitin 2015, periudhë kur, sipas saj, mungoi vizioni i qartë përballë pasojave të mundshme. "Ne si LVV kemi kundërshtuar themelimin e Dhomave të Specializuara dikur dhe qëndrojmë kundër tyre edhe sot", u shpreh Nagavci gjatë fjalës së saj. Ajo shtoi se kuadri ligjor për funksionimin e kësaj gjykate ishte votuar nga mazhoranca e atëhershme e Kuvendit. "Këtë nuk po e rifreskojmë për të krijuar përçarje, mirëpo nuk mund të lihet pa u përmendur", u shpreh ajo, duke e konsideruar ndërgjegjësimin apo reagimin pas një dekade si tepër të vonuar. Megjithatë, Nagavci theksoi se në rast se subjektet politike që votuan pro themelimit të Gjykatës Speciale në vitin 2015 paraqesin sot kërkesë për amandamentimin e ligjit, Lëvizja Vetëvendosje do t'i bashkohet kësaj nisme duke e mbështetur atë.