Momente interesante në Kuvend: Kurti dhe Konjufca kapen nga kamerat gjatë fjalimit të Grudës

Kryeministri në detyrë, Albin Kurti, ka tërhequr vëmendjen e mediave gjatë seancës plenare të Kuvendit, teksa është parë në komunikim të afërt me kryeparlamentarin Glauk Konjufca. Ngjarja ka ndodhur në kohën kur nga foltorja po mbante fjalim deputeti i Partisë Demokratike të Kosovës, Përparim Gruda. Derisa po diskutoheshin ndryshimet e propozuara në Ligjin për Dhomat e Specializuara, kamerat kanë kapur momentin kur Kurti dhe Konjufca kanë shkëmbyer mes vete komente dhe mendime. Kryeministri në detyrë është shfaqur mjaft ekspresiv, duke shoqëruar bisedën me mimika të ndryshme të fytyrës, ndërkohë që nuk ka ngurruar të hedhë në letër edhe disa shënime. Kjo seancë e legjislativit po karakterizohet nga debate të ashpra parlamentare lidhur me nismën ligjore për Dhomat e Specializuara. Ndërkohë, dinamika e ngjarjeve është reflektuar edhe jashtë objektit të Kuvendit, ku një numër qytetarësh dhe veteranë të Ushtrisë Çlirimtare të Kosovës janë tubuar në shenjë proteste, duke kërkuar mbështetjen dhe miratimin përfundimtar të ndryshimeve ligjore.