Debat rreth Gjykatës Speciale: Kritika e ashpër e zyrtarit të LVV-së ndaj partisë së tij dhe PDK-së

Alban Krasniqi, anëtar i Lëvizjes Vetëvendosje në Komisionin Qendror të Zgjedhjeve, ka shprehur hapur pakënaqësinë e tij me qasjen e partisë së tij rreth ndryshimeve ligjore për Dhomat e Specializuara, duke mos kursyer as kritikat ndaj Partisë Demokratike të Kosovës. Sipas Krasniqit, vendimi i Lëvizjes Vetëvendosje për të votuar këtë projektligj mund të interpretohet si një lloj legjitimimi i Gjykatës Speciale, një zhvillim që ai e cilëson si tejet shqetësues për çdo aktivist që historikisht e ka kundërshtuar këtë institucion. Ai ka theksuar se ky akt normativ nuk e ka fuqinë për të shfuqizuar gjykatën e instaluar nga PDK-ja në të kaluarën. Në profilin e tij zyrtar në rrjetin social Facebook, Krasniqi ka shkruar: "Me faktin që LVV po e voton këtë ligj po i bie disi që e pranon këtë gjykatë dhe kjo është tejet e rëndë për secilin aktivist që ka kundërshtuar gjykatën speciale." Ai ka shtuar se ky është faturë që subjekti i tij po e lëshon si pasojë e veprimeve të mëparshme të PDK-së. "Sepse, vet ky far ligji i lodhët nuk e shfuqizon gjykatën speciale të PDKsë. Dhe ky është çmimi që VV po e paguan sot për tradhëtite e PDK-së dje," ka vijuar ai. Në fund të reagimit të tij, zyrtari i KQZ-së ka vënë në pikëpyetje edhe gatishmërinë e PDK-së për reflektim politik, duke akuzuar këtë të fundit për lojëra të rrezikshme gjatë dy javëve të fundit në raport me qytetarët, shoqatat e dala nga lufta dhe partnerët ndërkombëtarë: "Dhe a po shihni reflektim të PDKsë? Përkundrazi qe 2 javë po luajnë një lojë tejet të rrezikshme sa me qytetarët dhe kategoritë e luftës aq edhe me faktorin ndërkombëtar."