Bujë në Britani: Ish-Princi Andrew ndërmerr hapa ligjorë kundër policisë pas arrestimit të bujshëm lidhur me rastin Epstein

Ish-princi britanik Andrew Mountbatten-Windsor ka ndërmarrë një hap historik duke iu drejtuar gjykatës, me qëllim që të vlerësohet ligjshmëria e veprimeve të forcave të rendit gjatë ndalimit të tij bujshëm tetë muaj më parë. Mbrojtja e tij ka kërkuar një shqyrtim zyrtar gjyqësor lidhur me urdhrat e kontrollit që i mundësuan policisë të ndërhynte në banesën e tij në pronën Sandringham, si dhe në ish-rezidencën Royal Lodge në Windsor. Ky zhvillim shënon një precedent të rrallë në historinë moderne të Britanisë së Madhe, pasi është rasti i parë që prej vitit 1649, gjatë gjyqit të Charles I, që një anëtar i familjes mbretërore sfidon hapur ligjshmërinë e procedurave ligjore të ndërmarra ndaj tij. Sipas burimeve mediatike, brenda kësaj jave pritet të zhvillohet një seancë e mbyllur në Gjykatën e Lartë, ku do të vendoset për çështjen e zbardhjes së dokumenteve përkatëse gjyqësore. Kujtojmë se ish-princi u vu në pranga në muajin shkurt në pronën e tij në Marsh Farm, në Norfolk, pikërsisht në ditën e 66-të të lindjes së tij. Arrestimi pasoi daljen në dritë të dokumenteve nga dosjet e njohura të Epstein, të cilat ngritën dyshime se ai mund të ketë ndarë të dhëna konfidenciale me të ndjerin Jeffrey Epstein, i dënuar për krime seksuale, gjatë periudhës kur Andrew ushtronte detyrën e të dërguarit tregtar të Mbretërisë së Bashkuar nga viti 2001 deri në vitin 2011. Pas ndalimit, ai u shoqërua në komisariatin e qytetit të Aylsham, ku u mbajt dhe u mor në pyetje për afro 12 orë rresht nën akuzat për shpërdorim të detyrës zyrtare. Hetuesit dyshojnë se ish-zyrtari i lartë mbretëror i ka përcjellë Epstein raporte të detajuara mbi udhëtimet e tij zyrtare në shtete të ndryshme aziatike, përfshirë Kinën, Hong-Kongun, Vietnamin dhe Singaporin.