Ironia e Mercedes ndaj Ferrarit kthehet në boomerang: Gjiganti gjerman detyrohet të fshijë postimin pas dështimit në pistë

Gara e çmendur e Çmimit të Madh të Bahreinit në Formula 1, e cila u zhvillua në Malajzi për shkak të zhvillimeve gjeopolitike në Lindjen e Mesme, prodhoi një episod mjaft interesant në rrjetet sociale ku protagonist u bë ekipi i Mercedesit. Skuadra gjermane u përpoq të ironizonte rivalët e saj të Ferrarit, mirëpo situata mori një kthesë të papritur, duke u shndërruar në një boomerang për vetë ata. Gjatë xhiros së parë të formimit nën reshjet e dendura në Sepang, një defekt teknik në softuer preku njësinë e fuqisë së disa bolideve, përfshirë edhe atë të Lewis Hamilton me Ferrari, i cili u detyrua të kryente një ndalesë të përkohshme buzë pistës. Duke parë këtë, Mercedes përfitoi menjëherë për të lëshuar një kunj sarkastike përmes një postimi: 'Procedura e startit u pezullua sepse disa makina me motorë Ferrari janë ndalur anës pistës', shoqëruar me një emoji tallës. Megjithatë, reagimi i komunitetit të zjarrtë të Formula 1 ishte i menjëhershëm. Përdoruesit e platformës e kundërshtuan ashpër postimin, duke vënë në dukje se i njëjti problem teknik kishte goditur edhe konstruktorë të tjerë si Red Bull e McLaren, e jo vetëm makinat e pajisura me motorë Ferrari. Për më tepër, Federata Ndërkombëtare e Automobilizmit (FIA) konfirmoi zyrtarisht se defekti nuk ishte përgjegjësi e vetë skuadrave. Goditja përfundimtare për ekipin gjerman erdhi nga vetë zhvillimet në pistë. Pas një prishjeje të njësisë së fuqisë dhe tërheqjes përfundimtare nga gara të pilotit George Russell, Mercedes u vu në siklet të madh dhe u detyrua të fshinte me shpejtësi postimin e bërë më herët.