Gatishmëri dhe optimizëm te Kombëtarja e Kosovës në hendboll, Shoshtariq ndan përshtypjet e para nga grumbullimi

Përzgjedhësi i Përfaqësueses së Kosovës në hendboll, Nenad Shoshtariq, ka shprehur një kënaqësi të lartë për ecurinë dhe angazhimin në kampin stërvitor të Kombëtarja A. Gjatë ditës së sotme, skuadra jonë zhvilloi një ndeshje kontrolluese ndaj ekipit të njohur maqedonas, Gjorche Petrov, duel i cili u mbyll me shifrat bindëse 34:17 në favor të tonë. Strategu kroat në krye të shtabit teknik ka ndarë me opinionin publik fokusin e punës në këtë fazë, si dhe synimet dhe sfidat që e presin ekipin në të ardhmen e afërt. “Jemi bashkuar në këtë grumbullim për katër ditë. Kemi zhvilluar tri seanca stërvitore dhe sonte patëm testin tonë përmes kësaj ndeshjeje”, u shpreh fillimisht Shoshtariq. Ai theksoi rëndësinë e kësaj periudhe për të konsoliduar grupin, duke shtuar se nesër do të zhvillohen edhe dy stërvitje të tjera. “Ishte thelbësore të kalonim kohë bashkë, të njihemi më mirë, që lojtaret të kuptojnë vizionin tim dhe unë mentalitetin e tyre, pasi sfidat ndaj Estonisë mbeten ngjarja më e rëndësishme për këtë pjesë të vitit”. Tekniku kroat nuk e fshehu befazinë pozitive ndaj cilësive që ka parë te vashat tona të hendbollit. “Jam befasuar në mënyrë të këndshme me disa segmente të lojës që zotërojnë vajzat. Vërtet kam mbetur i habitur për mirë nga paraqitja e disa prej lojtareve”. Megjithatë, ai tërhoqi vëmendjen se puna vetëm sa ka nisur dhe se ka ende hapësira të mëdha për përmirësim. “Në anën tjetër, na presin detyra të shumta, posaçërisht në repartin e mbrojtjes dhe në aspekte të caktuara të skemave tona sulmuese”. Duke e vlerësuar këtë nisje si një themel të fortë, Shoshtariq porositi se uniteti është çelësi i suksesit. “Por, ky hap i parë është hedhur shumë mbarë. Duhet të forcojmë përgatitjet tona dhe të kuptojmë se për të arritur rezultate, duhet të veprojmë si një familje e vetme, si një ekip i vërtetë. Duhet të luftojmë bashkë, të sakrifikojmë bashkë dhe padyshim që suksesi nuk do të mungojë”, përfundoi ai.