Mobilizim i jashtëzakonshëm i sigurisë para Kuvendit: Policia dhe zjarrfikësit rrethojnë institucionet, nisin protestat e qytetarëve dhe veteranëve

Oborri i Qeverisë dhe Kuvendit të Kosovës është blinduar nga forca të shumta të Policisë së Kosovës dhe ekipe të zjarrfikësve. Ky mobilizim i shtuar i organeve të rendit vjen në kohën kur para ndërtesave të institucioneve qendrore po vazhdon grumbullimi i qytetarëve në shenjë pakënaqësie. Masat e rrepta të sigurisë përkojnë me kërkesën e prerë të protestuesve drejtuar deputetëve të Kuvendit, nga të cilët kërkohet votimi i ndryshimeve në Ligjin për Dhomat e Specializuara. Tubimi i qytetarëve ka nisur që nga mbrëmja e së dielës, si pjesë e nismës së organizuar nën moton "Jo në emrin tim". Ndërkohë, nga ora 09:00 është paraparë të nisë seanca plenare e Kuvendit të Kosovës, ku projektligji për ndryshimin dhe plotësimin e Ligjit për Dhomat e Specializuara është pozicionuar si pika e parë e rendit të ditës. Paralelisht me këtë reagim qytetar, para ndërtesës së Parlamentit është paralajmëruar të mbahet edhe një protestë e thirrur nga Organizata e Veteranëve të Luftës së UÇK-së.