Nis epoka e Rolando Maran: Trajneri italian kërkon debutim fitues me Shqipërinë ndaj Bjellorusisë

Prezantimi zyrtar dhe sfida e parë e rëndësishme për Rolando Maran në krye të stolin kuqezi do të regjistrohet ditën e nesërme. Kombëtarja shqiptare do të presë Bjellorusinë këtë të shtunë në stadiumin “Air Albania”, me sfidën që është planifikuar të startojë në orën 20:45. Për teknikun italian, ky duel shënon fillimin e vërtetë zyrtar me përfaqësuesen tonë, duke qenë se ndeshjet e muajit të kaluar u konsideruan vetëm si takime miqësore. 63-vjeçari e nis këtë rrugëtim me një synim të qartë: kreun e grupit, përballë kundërshtarëve që në letër duken të përballueshëm. Përveç këtij objektivi primar, Maran ka shansin që përmes kësaj ndeshjeje t'i jepë fund serisë negative të rezultateve pa fitore për kuqezinjtë. Suksesi i fundit i Shqipërisë daton që nga sfida në transfertë kundër Andorrës, e fituar me rezultatin minimal 0-1. Që nga ajo periudhë, skuadra ka regjistruar pesë humbje, ku tri prej tyre i takojnë ndeshjeve miqësore. Një paraqitje pozitive dhe marrja e tri pikëve do të përbënin nisjen ideale për strategun italian në krye të skuadrës, ndaj sytë e të gjithëve janë drejtuar nga ky takim për të zbuluar skemën dhe strategjinë që Maran do të aplikojë në debutimin e tij zyrtar në Tiranë.