Debati për Ligjin e Speciales, Xhymshiti i kundërpërgjigjet ashpër Endrit Thaçit: Babai yt është gjallë, por kush ua kthen 96 të vrarët familjeve?

Thirrja publike e Endrit Thaçit drejtuar partive politike që të bashkojnë forcat për miratimin e ndryshimeve ligjore, të cilat do t'i hapnin rrugë lirimit të ish-presidentit Hashim Thaçi dhe ish-krerëve të tjerë të UÇK-së, ka shkaktuar debate të forta në opinionin publik. Kjo kërkesë është kundërshtuar ashpër nga gazetari dhe publicisti Vudi Xhymshiti, i cili e ka zhvendosur fokusin e diskutimit te familjet e viktimave të luftës, duke përmendur drejtpërdrejt vendimet e fundit dhe gjetjet e Dhomave të Specializuara në Hagë. Në një reagim të drejtpërdrejtë, Xhymshiti i është drejtuar Endrit Thaçit duke i sugjeruar që, para se të kërkojë solidarizim politik për babanë e tij, të vizitojë familjet që ende mbajnë fotografitë e më të dashurve të tyre në mure, duke përmendur si shembull familjen e Behajdin Allaqit dhe duke ngritur pyetjen se kush do t'ua kthejë atyre njerëzit e humbur. Publicisti thekson se ndërkohë që kërkohet rikthimi i ish-presidentit në shtëpi, ka fëmijë që janë rritur pa e njohur kurrë atë mundësi, gra që kanë pritur burrat dhe nëna që kanë humbur djemtë, për të cilët nuk pati as ndryshime ligjore dhe as bashkim politik, por vetëm karrige të zbrazëta dhe varre. Më tej, ai kujton shifrat dhe gjetjet e gjykatës, e cila konstatoi përgjegjësi penale për 385 ndalime arbitrare, 49 raste të trajtimit mizor, 303 viktima torture dhe 96 viktima vrasjeje, ku Hashim Thaçi u dënua me 25 vjet burg pasi u gjet kontribues në ndërmarrjen e përbashkët kriminale ndaj kundërshtarëve të perceptuar. Xhymshiti e mbyll reagimin e tij duke theksuar se, pavarësisht të drejtës legjitime për të dashur dhe kërkuar praninë e babait, kërkesa për ndërhyrje politike për të shmangur pasojat e një aktgjykimi për torturë dhe vrasje nuk mund të bëhet duke kërkuar që shoqëria t'i mbyllë sytë para dhimbjes së viktimave, duke lënë të hapur pyetjen thelbësore se kush do t'ia kthejë 96 të vrarët familjeve të tyre.