Zgjedhjet në Serbi: Shaip Kamberi njofton dorëzimin e listës së përbashkët të "Koalicionit Shqiptar"

Përfaqësuesi i shqiptarëve në parlamentin serb, Shaip Kamberi, ka bërë të ditur se “Koalicioni Shqiptar” ka zyrtarizuar dorëzimin e listës së tij zgjedhore pranë Komisionit Zgjedhor në Serbi. Nëpërmjet një reagimi publik, Kamberi ka përcjellë mirënjohjen e tij për secilin aktivist politik për përkushtimin e treguar, si dhe për secilin qytetar shqiptar të Luginës për mbështetjen e dhënë. Ai ka vënë në dukje se pavarësisht dallimeve që shpesh ndajnë faktorin politik shqiptar, përpjekja e përbashkët kundër trajtimit diskriminues shtetëror duhet të shërbejë si forcë unifikuese. "Në këto zgjedhje, për herë të parë, të gjithë të bashkuar në një listë, me mbështetjen e Qeverisë së Kosovës dhe asaj të Shqipërisë, vazhdojmë betejën me një qëllim të qartë, që e vërteta e Luginës të jehojë sa më fuqishëm", ka deklaruar Kamberi. Sipas tij, ky organizim i përbashkët krijon një shans real që komuniteti shqiptar të sigurojë më shumë se një ulëse në legjislativin e ardhshëm. "Duhet ta shfrytëzojë në maksimum", ka shkruar ai. Kamberi ka shtuar gjithashtu se, në një kohë kur skena politike në Serbi mund të përballet me transformime të rëndësishme, zëri i tyre dhe problematikat e diskriminimit institucional duhet të jenë në qendër të vëmendjes dhe të pazëvendësueshme në çdo proces. "Le të na prijë e mbara, BASHKË", ka përfunduar Kamberi.