Kriza e pasluftës: Sektori privat në Kosovë rrezikon falimentimin masiv

Sektori privat në vend po përballet me periudhën e tij më të errët që nga përfundimi i luftës, ku vështirësitë e akumuluara ekonomike i kanë sjellë ndërmarrjet në buzë të greminës. Kështu ka bërë të ditur Gëzon Berisha, kryetar i Shoqatës së Gurthyesve të Kosovës (që vepron në kuadër të Lidhjes së Bizneseve të Kosovës), i cili thekson se goditjet e njëpasnjëshme kanë krijuar një situatë tejet alarmante për ekonominë vendase. Sipas kreut të Shoqatës së Gurthyesve, rëndimi i kushteve ka ardhur si pasojë e drejtpërdrejtë e inflacionit të lartë, shtrenjtimit drastik të derivateve të naftës – të cilat përbëjnë lëndën e parë për këtë industri – si dhe rritjes së çmimit të energjisë elektrike. Kësaj i shtohet edhe mungesa e harmonizimit të ligjeve në fuqi, dukuri kjo që ka bllokuar funksioniminnormal të sipërmarrjeve, duke i vënë ato realisht në rrezik falimentimi për shkak të krizave kronike që nuk po njohin ndalesë. Berisha parashikon një situatë kritike edhe për periudhën në vijim, duke vlerësuar se viti 2026 do të jetë vit i rëndë krize, ndërsa pasojat shkatërruese të saj do të shtrihen e do të ndihen fuqishëm edhe gjatë vitit 2027. Përballë këtij ngërçi ekonomik, ai i ka drejtuar një thirrje urgjente kryeministrit të Kosovës, Albin Kurti, dhe ekzekutivit që të hapin dyert për një takim të përbashkët me përfaqësuesit e bizneseve, me qëllim gjetjen e daljeve nga kjo gjendje. Duke u ndalur te sfidat legjislative, veçanërisht në fushën e minierave dhe mineraleve ku ai vetë bën pjesë, Berisha ka ngritur shqetësimin se ndërmarrjet po vuajnë prej vitesh mungesën e licencave, lejeve dhe vendimeve zyrtare. Ky bllokim vjen pikërisht nga mospërputhjet ligjore, ku aktet normative bien ndesh me njëra-tjetrën dhe faturën e rëndë të kësaj burokracie e paguajnë drejtpërdrejt prodhuesit dhe tregtarët. Në fund, kryetari i Shoqatës i ka bërë thirrje Qeverisë që të tregojë përgjegjësi më të lartë institucionale ndaj komunitetit të biznesit, duke e cilësuar ekonominë si shtyllën vertebrale të shtetit dhe mbushësen kryesore të arkës buxhetore. Sipas tij, dështimi në mbrojtjen dhe zhvillimin e një ekonomie të shëndoshë rrezikon seriozisht vetë funksionimin dhe ekzistencën e shtetit.