Munishi merr në mbrojtje Rashicën: Sulmet vijnë nga persona që nuk ia kanë idenë e lojës

Trajnieri i njohur kosovar, Ismet Munishi, ka dalë hapur në mbrojtje të anëtarit të Përfaqësueses së Kosovës, Milot Rashica, duke u dhënë përgjigje të ashpër kritikëve të këtij të fundit. Gjatë një prononcimi të bërë në emisionin sportiv “Kampionët”, strategu vendor ka evokuar rrugëtimin e gjatë të Rashicës me fanellën e kombëtares, si dhe eksperiencën e tij të pasur në kampionatet e huaja elitare. “Milot Rashica i ka 70 paraqitje me kombëtaren dhe kritikohet nga ata që s’dinë për futboll. Në vende ku ka luajtur Rashica, as vizën nuk mundemi me marrë”, ka deklaruar ndër të tjera Munishi. Në këtë mënyrë, ai ka hedhur poshtë çdo kritikë të drejtuar ndaj yllit kosovar, duke theksuar peshën e madhe të karrierës së tij ndërkombëtare dhe kontributin e dhënë ndër vite.