Dramë në Porto: Portugalia përmbys Norvegjinë në minutat e fundit dhe ruan kreun

Portugalia ka siguruar një fitore dramatike me rezultatin 2:1 përballë Norvegjisë, në sfidën e zhvilluar në stadiumin “do Dragao” në Porto. Të dyja përfaqësueset dhuruan një paraqitje të zjarrtë në fushë, ku norvegjezët rezultuan të pafat, në kuadër të xhiros së katërt të Ligës A të Kombeve. Ekuilibrat e ndeshjes u thyen në minutën e 36-të, kur Kristoffer Ajer përfitoi nga një harkim pas goditjes së dënimit për të realizuar një gol spektakolar për Norvegjinë. Ai lëshoi një predhë të vërtetë nga skaji i zonës së rreptësisë, duke e ndalur topin në këndin e sipërm të djathtë dhe duke kaluar skuadrën e tij në avantazh 0:1. Megjithatë, reagimi i portugezëve ishte i menjëhershëm. Vetëm dy minuta më vonë, në minutën e 38-të, Joao Cancelo shfaqi një teknikë të lartë duke goditur menjëherë një top nga distanca jashtë zonës, i cili u ndal në trekëndëshin e djathtë të portës për të barazuar shifrat në 1:1. Kur duelit po i vinte fundi, në minutën e 79-të, Joao Felix dhuroi një pasim perfekt për Gonçalo Ramosin, i cili nga afërsia nuk gaboi, duke e dërguar topin në rrjetë dhe duke përmbysur rezultatin në 2:1 për Portugalinë. Në minutën e 86-të, portugezët mbetën me dhjetë lojtarë, pasi Francisco Conceiçao u ndëshkua me kartonin e dytë të verdhë për shkak të protestave të ashpra ndaj gjyqtarit kryesor Maurizio Mariani, i cili i tregoi kartonin e kuq. Pas kësaj ndeshjeje, në Grupin 4, Portugalia vazhdon të udhëheqë e sigurt me 12 pikë të grumbulluara, e ndjekur nga Danimarka me 6 pikë, Uellsi me 3 pikë dhe Norvegjia që mbyll renditjen po me 3 pikë.