Gjermania ngec në Selanik, duel pa gola ndaj Greqisë në Ligën e Kombeve

Përfaqësuesja e Gjermanisë është detyruar të mjaftohet me vetëm një pikë nga udhëtimi në Selanik, pasi ka barazuar pa gola (0:0) ndaj Greqisë, në kuadër të xhiros së katërt për Ligën A në Ligën e Kombeve. Sfida nisi me rrezikshmëri të lartë nga vendasit qysh në minutën e dytë, kur Georgios Masouras përfitoi nga një harkim i saktë dhe goditi me kokë drejt këndit të poshtëm të majtë. Megjithatë, tentativa e tij nga afërsia çalonte në fuqi, duke u shndërruar në një pre të lehtë për portierin Jonas Urbig, i cili neutralizoi gjithçka pa u sforcuar. Ndërkohë, reagimi i gjermanëve erdhi në minutën e 26-të përmes David Raum. Ky i fundit arriti të shkëputet bukur nga mbrojtja kundërshtare dhe lëshoi një gjuajtje të rrezikshme drejt cepit të majtë të portës, por portieri Konstantinos Tzolakis ishte i vëmendshëm dhe e zotëroi topin pa probleme. Pas kësaj ndeshjeje, situata në Grupin 2 tregon se Holanda mban kreun me 8 pikë, aq sa ka edhe Greqia që pozicionohet e dyta, ndërsa Gjermania zbret në vendin e tretë me 5 pikë të tubuara, kurse Serbia mbyll renditjen pa asnjë pikë.