Rrëfimi i madh i Wesley Sneijder: Si e dinim se do të fitonim Tripleta-n historike me Interin

Festivali i Sportit, i organizuar nga e përditshmja italiane ‘La Gazzetta Dello Sport’, është përmbyllur me një protagonist absolut dhe njëkohësisht të ftuar special, ish-mesfushorin e njohur holandez, Wesley Sneijder. I duartrokitur gjatë nga të pranishmit, ai ka hapur zemrën për të ndarë kujtimet e paharruara të karrierës së tij. "Kur kthej kokën pas dhe i kujtoj ato momente, më kaplojnë të dridhurat. Jam jashtëzakonisht i lumtur që kam përjetuar emocione kaq të fuqishme," u shpreh Sneijder, duke evokuar triumfin e madh të Interit, figurën e Jose Mourinhos dhe grupin e legjendarëve që nuk njihnin humbje. "Ishte një vit magjik. Mourinho më telefonoi dhe më tha se unë isha pjesa e fundit që i duhej mozaikut të tij për të triumfuar. Pas pak muajsh e kuptova se kishte të drejtë. Erdha dhe menjëherë mposhtëm Milanin me rezultatin e pastër 4-0. Çfarë mund të kërkoja më shumë?" Duke udhëtuar nëpër kujtimet e atij sezoni të jashtëzakonshëm, Sneijder përmendi edhe miqësinë e tij të ngushtë me Cristian Chivun. "Të luaja në Ligën e Kampionëve ishte ëndrra ime e fëmijërisë. Kishim një grup fantastik, ku Chivu, pavarësisht moshës së re, vepronte si një lider i vërtetë. Christianin e kam shumë për zemër, pasi na lidh një njohje e gjatë." Atmosfera në atë dhomë zhveshjeje ishte unike dhe plot dinamikë. Sneijder zbuloi edhe detaje argëtuese nga rutina e skuadrës: "Ishte një grup i çmendur, por kur fiton, i lejon vetes pak liri më shumë. Të gjithë përveç Zanettit. Javier ishte gjithmonë i pari që mbërrinte në stërvitje dhe i fundit që largohej. Ne të tjerët mund të pini ndonjë pije herë pas here, por ai kurrë, vetëm ujë. Madje, për të qeshur, pas një fitoreje u deh... vetëm me Coca Cola!" Nata e madhe e Madridit, ku Interi mundi Bayernin e Mynihut për të ngritur trofeun e Champions League pas dekadash pritjeje, mbetet e skalitur thellë. "Ishim plotësisht të bindur se do të fitonim, dhe kjo ishte meritë e drejtpërdrejtë e Mourinhos," vazhdon rrëfimin holandezi. "Kujtoj një atmosferë disi të pazakontë, por e dija se triumfi ishte i yni, pyetja e vetme ishte thjesht 'kur'. Megjithatë, nuk e kisha imagjinuar kurrë se po atë mbrëmje Jose do të largohej. Ai është vërtet 'Special One', sidomos për nga ana psikologjike. Dhe ende mbetet në majë, nuk është rastësi që drejton Realin e Madridit." Sneijder ndau gjithashtu një episod që ilustron më së miri gjenialitetin e portugezit në menaxhimin e lojtarëve. "Maicon u skualifikua për dy ndeshje. Çdo trajner tjetër do t'i kishte bërtitur, por Jose e dërgoi në Brazil për dy javë pushim. A mendoni se ai e zhgënjeu trajnerin pas kthimit? Ky ishte Mourinho." Duke kaluar te periudha pas largimit të tij, ish-ylli zikaltër përmendi edhe zhgënjimet e vitit 2010, si finalja e humbur e Botërorit dhe mungesa në podiumin e Topit të Artë. "Ajo pritje e mallkuar e Casillas në shpatull... po të mos ishte ajo, do të kishim fituar ne," tregon ai. "Sa për Topin e Artë, nuk e vras mendjen; më mjafton që fitova Champions League dhe Tripletën historike me Interin." Megjithatë, epoka post-Mourinho nuk rezultoi e lehtë për klubin. "Me Eto'o e kuptuam shpejt se diçka ishte thyer brenda grupit. Ai nuk ishte më i njëjti dhe pas dy sezonesh u largua nga Milano. Më vonë, kur klubi vendosi të më ulte pagën, kushtet për të vijuar më tej nuk ekzistonin më." Pas varfërimit të këpucëve në gozhdë, Sneijder zgjodhi t'i qëndrojë larg fushave të futbollit për një kohë të gjatë, për shkak të dramave personale. "Kur u tërhoqa, u përballova me sprova shumë të vështira. Nëna ime u sëmur rëndë dhe ndërroi jetë pas një kohe të shkurtër, e menjëherë pas saj edhe babai im. Luftova fort për ta dhe i kushtova tre vite të plota familjes sime. Kalova një fazë të rëndë, shtova në peshë dhe ndihesha keq shpirtërisht. Tani po përpiqem të rimarr veten, duke pranuar se prindërit e me nuk do të kthehen më. Përtej kësaj, jam angazhuar në projekte të reja, siç ishte pjesëmarrja në reality show-n 'Football Island', ku njëmbëdhjetë ish-futbollistë holandezë jetojnë në një ishull pa ushqim dhe luajnë futboll; ishte një eksperiencë shumë e bukur."