Tërmet politik në Gjermani: Sondazhet nxjerrin AfD-në në krye, goditje e rëndë për kancelarin Merz

Zgjedhjet e zhvilluara gjatë muajit shtator në tri lande gjermane shërbyen si një barometër kyç për të matur pulsin e opinionit publik në vend, duke sjellë rezultate katastrofale për Bashkimin Kristian Demokrat (CDU) të Kancelarit Friedrich Merz. Në Saksoni-Anhalt, mbështetja për CDU-në u përgjysmua duke i kushtuar humbjen e pushtetit, fat i cili u ndoq edhe në qytet-landin e Berlinit. Ndërkohë, disfata në Mecklenburg-Vorpommern mori përmasa historike, pasi partia dështoi të kalonte qoftë edhe pragun zgjedhor – një ngjarje pa precedent në historinë e pasluftës së Gjermanisë. Kancelari, i cili vuante prej kohësh nga një mbështetje anemike, ka regjistruar rënie të mëtejshme në sondazhe, ndërsa e gjithë qeveria e koalicionit të përbërë nga CDU, CSU dhe SPD përballet me pakënaqësi të thella popullore. Vetëm një në dhjetë qytetarë gjermanë shprehet i kënaqur me punën e ekzekutivit dhe të kreut të qeverisë, shifra këto që shënojnë nivele minimale historike. Edhe brenda radhëve të vetë elektoratit të CDU-së, vetëm 40 përqind e mbështetësve ruajnë ende besimin te Kancelari Friedrich Merz. Këto të dhëna vijnë nga matja e fundit e opinionit publik nga ARD-Deutschlandtrend, realizuar nga Instituti Infratest Dimap, i cili ka anketuar 1,303 votues gjatë periudhës 28-30 shtator. Sipas këtij sondazhi, Partia Alternativa për Gjermaninë (AfD) – e cila vlerësohet se përfshin elementë të ekstremit të djathtë – po kapitalizon maksimalisht këtë pakënaqësi të gjerë qytetare. Në një skenar ku zgjedhjet e Bundestagut do të mbaheshin sot, blloku konservator CDU/CSU do të siguronte vetëm 20 përqind të votave, duke shënuar një ndër rezultatet më të dobëta në ekzistencën e tyre, ndërsa Socialdemokratët (SPD) mbeten të ngujuar në kuotën e 13 përqindëshit. Kjo përkthehet në një dështim të partive në pushtet për të arritur qoftë edhe një të tretën e mbështetjes, duke humbur përfundimisht shumicën parlamentare. Përballë kësaj panorame, AfD ngjitet në vendin e parë me 27 përqind të preferencave elektorale. Të Gjelbrit kanë shënuar një rritje të lehtë duke kapur 16 përqind (+1), Partia e Majtë ka pësuar një rënie prej 1% duke zbritur në 11 përqind, kurse Liberalët (FDP) rrezikojnë mbetjen jashtë parlamentit me vetëm 4%. Këto zhvillim paralajmërojnë një proces tejet të ndërlikuar për formimin e një qeverie të ardhshme. Pasiguria e qytetarëve gjermanë ushqehet edhe nga sfida e kriza të tjera globale e teknologjike. Rreth dy të tretat e popullsisë shfaqin frikë se njerëzimi mund të humbasë kontrollin mbi inteligjencën artificiale, ndërsa i njëjti numër i qytetarëve ndihen të shqetësuar nga ndikimi i politikave të Presidentit amerikan Donald Trump në arenën gjermane. Mbi gjashtë nga dhjetë qytetarë mbeten të alarmuar nga ndryshimet klimatike, dhe gjysma e tyre frikësohen nga një sulm i mundshëm rus ndaj shteteve të tjera evropiane. Rreth 50 përqind e gjermanëve shprehin gjithashtu ankth për të ardhmen e standardit të tyre të jetesës dhe për sfidën e vazhdueshme të emigracionit. Megjithatë, burimi më i madh i zhgënjimit mbetet paaftësia e klasës politike për të gjetur zgjidhje unike e konsensuale për temat më jetike të vendit. Në total, rreth 90% e gjermanëve e vëzhgojnë me pesimizëm të thellë realitetin aktual politik. Mosbesimi publik është veçanërisht i lartë ndaj nismave qeveritare për reformat sociale, në një kohë kur Gjermania përballet me një plakje të shpejtë të popullsisë. Pakësimi i fuqisë punëtore detyrohet të mbajë në këmbë një numër në rritje eksponencial pensionistësh, duke rënduar ndjeshëm sistemin e kujdesit shëndetësor. Që prej vitit 2015, numri i personave që kërkojnë kujdes afatgjatë është rritur nga rreth 2.8 milionë në afërsisht 6.5 milionë, një shifër kjo që vazhdon të shënojë rritje të pandalshme.