Franco Foda zbulon arsyen e largimit të Zhegrovës dhe flet për zhgënjimin pas barazimit me Austrinë

Përzgjedhësi i Përfaqësueses së Kosovës, Franco Foda, ka analizuar paraqitjen e ekipit të tij pas barazimit 1:1 kundër Austrisë në stadiumin “Fadil Vokrri”, sfidë kjo e vlefshme për Ligën e Kombeve. Strategu gjerman u nda i lumtur me angazhimin e futbollistëve në fushë, duke vënë njoft se “Dardanët” patën mundësi reale për të dyfishuar epërsinë, megjithëse fitorja në fund u shmang. “Lojë e mirë, e madhe. Lojtarët e kanë kurorën në fushë. Jam shumë i kënaqur me ekipin, me secilin lojtar. Ishim afër të bënim 2:0, por kjo nuk ndodhi. E pritëm një fitore sonte, por nuk ndodhi ashtu”, deklaroi Foda. Sipas trajnerit, fakti që lojtarët ishin të mërzitur me këtë rezultat dëshmon qartë rritjen e ambicieve dhe standardeve brenda kampit kosovar. “Para dy viteve erdha këtu dhe në atë kohë, një barazim 1:1 ndaj Austrisë do të na kishte gëzuar. Sot të gjithë lojtarët janë të zhgënjyer. Kjo është situata”, shtoi ai. Pasi e cilësoi Austrinë si një kundërshtar me bagazh të pasur ndërkombëtar, Foda shprehu bindjen se Kosova shpejt do të jetë e aftë të mposht edhe superfuqitë e futbollit. “Austria është një kombëtare e madhe, ka luajtur në Botëror dhe në Europian. Unë pres shumë nga ekipi dhe në të ardhmen mund të fitojmë edhe ndaj kombëtareve të mëdha”, u shpreh ai. Gjatë konferencës, tekniku kuqezi sqaroi edhe arsyen pse vendosi ta nxirrte nga loja Edon Zhegrovën para se të mbaronte takimi. “Edoni më tha se kishte probleme. Nuk mundi ta përballonte lojën deri në fund. Edhe te Juventusi ka pak minuta. Ishte dëshira e Edonit”, u shpreh ai, duke dhënë detaje edhe për kapitenin Vedat Muriqi. “E njëjta ishte edhe me Vedat Muriqin. Ai vetë e kërkoi këtë. E rëndësishme është se të gjithë dhanë më shumë minuta sesa mundën.” Aktualisht, Kosova numëron pesë pikë në grupin e saj, ndërsa Austria mban kreun me tetë sosh, teksa sfidat e radhës për “Dardanët” janë planifikuar për muajin nëntor ndaj Izraelit dhe Irlandës.