Ngërçi politik në Kuvend i kushton Kosovës mbi 40 milionë euro nga Bashkimi Evropian

Për shkak të bllokadës politike në Kuvend, Kosova ka humbur zyrtarisht mbi 40 milionë euro nga Bashkimi Evropian, një situatë kjo që ka shtyrë kryeministrin Albin Kurti të lëshojë një paralajmërim serioz për mundësinë e zgjedhjeve të reja. Gjatë mbajtjes së mbledhjes së Këshillit Ministror për Integrim Evropian, kreu i ekzekutivit bëri të qartë se nëse deputetët nuk arrijnë të zgjedhin presidentin e ri deri më 6 tetor, vendi do të drejtohet në mënyrë automatike drejt zgjedhjeve të jashtëzakonshme parlamentare. Duke i cilësuar këto zgjedhje si të panevojshme dhe me kosto të lartë financiare, kryeministri fajësoi bllokadën në organin legjislativ për dëmtimin e drejtpërdrejtë të fondeve evropiane. Sipas tij, dështimi në votimin e ligjeve të rëndësishme ka lënë jashtë buxhetit miliona euro që i takonin Planit të Rritjes. Me afrimin e afatit kushtetues, skenari i zgjedhjeve të reja parlamentare — të cilat do të ishin të katërtat brenda më pak se dy vjetëve — po rikthehet fuqishëm si alternativë. Gjatë takimit të dytë të Këshillit Ministror për Integrim Evropian, që shërben edhe si Komitet Drejtues për Planin e Rritjes, kryeministri Albin Kurti u bëri thirrje ligjvënësve që të gjejnë gjuhën e përbashkët dhe konsensusin për kreun e shtetit, proces ky që zhvillohet brenda sallës plenare. “Nëse nuk do të arrijmë të zgjedhim president të ri, do të shkojmë sërish në zgjedhje, që do të jenë zgjedhjet e katërta në më pa se 2 vite. Zgjedhjet e reja janë të panevojshme e të kushtueshme .Ne tashmë kemi kryetarët e Kuvendit, kemi Qeveri të zgjedhur… Zgjedhjet e reja do të jenë sërish për Kuvend e për Qeveri e jo për president… Pse të shkojmë sërish në zgjedhje për ta konstituuar Kuvendin që s’mund të zgjedhë president”, u shpreh Kurti. Përtej krizës politike, shefi i Qeverisë vuri në dukje se mbarëvajtja e punës në Kuvend ndërlidhet ngushtë me fondet që Kosova pret nga Brukseli. Ai njoftoi se deri më 30 qershor, shteti ka përmbushur 20 hapa reformash në vlerë prej 153.3 milionë eurosh, raport i cili aktualisht po kalon në fazën e vlerësimit nga Komisioni Evropian për zhbllokimin e mjeteve. Megjithatë, pamundësimi i miratimit të ligjeve si pasojë e bllokadës parlamentare bëri që 6 nga 13 reformat e planifikuara të mos realizohen në afatin e duhur, duke lënë Kosovën pa përfituar mbi 40 milionë euro. Kryeministri njoftoi gjithashtu se në fillim të javës që vjen, në Kuvend do të dërgohen për shqyrtim tri marrëveshje ndërkombëtare të programeve IPA, përmes të cilave vendi synon të sigurojë 258 milionë euro, ndonëse sfida kryesore mbetet afati i fundit i vitit. “Tani vëmendja duhet të jetë te zbatimi i 22 reformave që skadojnë në fund të dhjetorit të sivjetmë, në vlerë prej 131.4 milionë euro në fondet e BE-së. Mbi 1/3 e këtyre reformave, apo saktësisht 8 sosh, kërkojnë miratim të projektligjeve në Kuvend. Bëhet fjalë për 10 projektligje që skadojnë më 31 dhjetor 2026… Nëse Kuvendi do të jetë funksional, reformat dhe mjetet e dedikuara për to nuk do të humbin”, deklaroi Kurti. Pas përfundimit të pjesës së hapur për media, mbledhja e Këshillit Ministror vijoi punimet prapa dyerve të mbyllura. Megjithatë, mesazhi i dhënë nga kryeministri mbeti i prerë: pa një Kuvend stabil dhe funksional që mundëson zgjedhjen e presidentit dhe miratimin e ligjeve, Kosova rrezikon jo vetëm stabilitetin e saj institucional, por edhe humbjen përfundimtare të qindra miliona eurove të dedikuara për zhvillim.