Kërcënimi me vrasje për Rexhep Selimin, reagon ashpër deputetja Shqipe Selimi dhe kërkon ndërhyrjen e drejtësisë

Deputetja e Lëvizjes Vetëvendosje, Shqipe Selimi, ka reaguar publikisht pasi në rrjetin social Facebook është shfaqur një koment që bën thirrje për ekzekutimin e bashkëshortit të saj, Rexhep Selimit, nëse ky i fundit kthehet në Kosovë nga Haga. Selimi bëri të ditur se për këtë mesazh kërcënues është vënë në dijeni përmes shkrimeve në media, ndërsa ngjarjen e ka cilësuar si tejet shqetësuese, duke kërkuar reagimin e menjëhershëm të organeve kompetente. "Si bashkëshorte dhe si qytetare e Republikës së Kosovës, e konsideroj këtë një çështje jashtëzakonisht serioze, e cila nuk mund dhe nuk duhet të kalojë pa u trajtuar nga institucionet përgjegjëse", ka shkruar ajo. Sipas saj, dallimet politike apo bindjet individuale nuk mund të shërbejnë kurrë si pretekst për të nxitur apo kërkuar eliminimin fizik të dikujt. "Liria e shprehjes nuk mund të përdoret si mbulesë për nxitjen e dhunës", ka deklaruar me vendosmëri Selimi. Në fund të reagimit të saj, ligjvënësja i është drejtuar Prokurorisë së Shtetit me kërkesën për të nisur hetimet, për të zbuluar identitetin e autorit të komentit dhe për të ndërmarrë hapat e nevojshëm ligjorë për përgjegjësinë penale. "Nuk kërkoj asgjë më shumë dhe asgjë më pak sesa zbatimin e ligjit dhe trajtimin me seriozitetin e duhur të një thirrjeje publike për marrjen e jetës së një njeriu", ka shkruar ajo.