Bedri Hamza shfaq optimizëm: Të gjithë deputetët pritet t'i japin mbështetje Projektligjit për Specialen

Pas një takimi intensive që zgjati mbi tri orë e gjysmë mes Grupit Parlamentar dhe Kryesisë, kryetari i PDK-së, Bedri Hamza, ka dalë në një konferencë për media ku është shprehur tejet optimist se gjatë seancës së nesërme do të votohet projektligji për plotësim-ndryshimin e Ligjit për Dhomat e Specializuara. Hamza ka theksuar se ky akt normativ ka një peshë të jashtëzakonshme për vendosjen e drejtësisë, duke shfrytëzuar rastin për t'u bërë thirrje të gjithë ligjvënësve të Kuvendit të Republikës së Kosovës që të bashkohen rreth kësaj nisme dhe t'i japin fund të gjitha procedurave të nevojshme parlamentare brenda ditës së nesërme. "Nesër jam optimist se ligjin do ta përkrahin të gjithë deputetët edhe i lus dhe i ftoj të gjithë deputetët e Kuvendit të Republikës së Kosovës që të jenë në mbështetje të këtij projektligji dhe ky ligj nesër t'i përfundojë të gjitha procedurat e nevojshme brenda Kuvendit të Republikës së Kosovës. Është një ligj tepër i rëndësishëm, është një ligj që kërkon të vendoset drejtësi. Nuk jemi kundër drejtësisë, jemi kundër padrejtësisë. Dhe deri më tani, çka kemi parë në proces: kemi parë mungesë transparence, mungesë llogaridhënieje, mungesë mbikëqyrjeje dhe kemi një vendim të padrejtë. Një vendim ku gjykohet historia, e tashmja dhe e ardhmja e Kosovës, ku qytetarët e Kosovës që përballen me këtë drejtësi, ballafaqohen me një proces të padrejtë, ku i shkelen edhe të drejtat e njeriut, siç kemi konstatime edhe prej organizatave kredibile ndërkombëtare", u shpreh Hamza gjatë fjalës së tij. Duke përmbledhur sfidat e deritanishme të këtij rrugëtimi, kreu i PDK-së pranoi se procesi është shoqëruar me vështirësi dhe pengesa të shumta, por sipas tij, ekziston vullneti për të ruajtur besimin në drejtësi. "Deri tash çka ka ndodhur: ka pasur shumë vështirësi, ka pasur shumë probleme, ka pasur shumë padrejtësi. Ne po duam të vazhdojmë të besojmë në drejtësi. Dhe për këtë qëllim, Apeli të zhvillohet brenda Dhomave të Specializuara, në kuadër të Dhomave të Specializuara, dhe ne presim që të ketë një vendim të drejtë, bazuar në fakte, në prova, jo thashetheme, jo të pavërteta, jo të ndërtohen dhe të sajohen krijesa që s'kanë ekzistuar", shtoi ai. Në lidhje me pyetjet për mundësinë e një marrëveshjeje për postin e presidentit, Hamza ka preferuar t'i mbajë këto dy tema plotësisht të ndara, duke e cilësuar miratimin e ligjit si një domosdoshmëri shtetërore që i tejkalon kufijtë e një partie apo qeverie të vetme. "E para, duhet ndarë këto dy gjëra. Çështja e ligjit dhe çështja e presidentit janë gjëra të ndara. Ligji është nevojë. Ligji e adreson një çështje që i kalon përmasat e një subjektit politik, e një mandatit të një qeverie. Çështjet e individëve, qytetarëve, është një ligj që kërkon drejtësi edhe me u vërtetuar ajo çka është pastërtia e luftës së Ushtrisë Çlirimtare të Kosovës. Ka qenë një luftë e imponuar, populli i Kosovës është organizuar për mbrojtjen e të drejtave të veta, për liri, për pavarësi, për shtet dhe ligji nuk ka të bëjë me një parti politike, nuk ka të bëjë me individë, ka të bëjë me mbrojtjen e të vërtetës historike. Prandaj këtu po flasim për mbrojtjen e të vërtetës historike. E pastaj, normalisht që pasi që veçse afatet kushtetuese po afrohen për presidentin, gjithmonë partitë politike janë për me biseduar edhe për çështjen qysh me i dhënë vendit institucione. Por nuk është që Partia Demokratike e trajton edhe e konsideron edhe e lejon që kjo çështje të trajtohet në nivel të pazareve politike. Është çështje tjetër puna e ligjit dhe është çështje tjetër puna e presidentit", sqaroi Hamza. Kujtojmë se Kuvendi i Kosovës do të mblidhet nesër në orën 09:00 në seancë plenare, ku në agjendë zyrtare figuron shqyrtimi i Projektligjit për Dhomat e Specializuara.