Valë pakënaqësish në Berlin dhe Prishtinë: Sot mbahen protestat me moton “Jo në emrin tim” kundër vendimit të Gjykatës Speciale

Kryeqyteti gjerman dhe ai i Kosovës bëhen sot, më 4 tetor, shesh tubimesh nën thirrjen “Jo në emrin tim”, si shenjë e qartë e kundërshtimit ndaj vendimit dënues të Gjykatës Speciale ndaj ish-udhëheqësve të Ushtrisë Çlirimtare të Kosovës (UÇK). Në qendër të Gjermanisë, protesta është thirrur të nisë në orën 12:00 para ndërtesës së Parlamentit gjerman, pranë Reichstagsgebäude, në adresën “Platz der Republik 1”. Organizatorët u kanë bërë thirrje bashkatdhetarëve që jetojnë në dijasporë t'i bashkohen kësaj nisme për të shprehur hapur pakënaqësinë ndaj vendimit të Speciales. Kjo valë reagimesh nga diaspora vjen pas një tubimi të ngjashëm që u mbajt të shtunën në Munih, ku shqiptarët atje ngritën zërin kundër aktgjykimit të fundit. Ndërkaq, në Prishtinë është paralajmëruar zhvillimi i protestës së 19-të radhazi, e cila gjithashtu mban logon “Jo në emrin tim”. Qytetarët do të mblidhen në sheshin “Skënderbeu”, ndërsa tubimi pritet të fillojë në orën 19:00. Përveç shprehjes së revoltës ndaj vendimit të Gjykatës Speciale, pjesëmarrësit në këtë protestë në kryeqytet do të kërkojnë nga Kuvendi i Kosovës ndërmarrjen e hapave konkretë, përkatësisht miratimin e Projektligjit për ndryshimin dhe plotësimin e Ligjit për Dhomat e Specializuara të Kosovës. Kujtojmë se më 16 shtator, Dhomat e Specializuara të Kosovës me seli në Hagë dhanë vendimin e shkallës së parë ndaj katër personaliteteve kyçe të UÇK-së: ish-presidentit Hashim Thaçi, ish-kryeparlamentarit Kadri Veseli, ish-zëvendëskryeministrit Jakup Krasniqi dhe ish-deputetit Rexhep Selimi. Të katërt ata u dënuan në total me 81 vjet heqje lirie.