Flakët jashtë kontrollit në Gjinar të Elbasanit, terreni i thyer pengon ndërhyrjen e zjarrfikësve

Beteja me flakët në fshatin Gjinar të Elbasanit vijon prej disa ditësh, ndërsa situata mbetet kritike për shkak të pamundësisë së ndërhyrjes së forcave zjarrfikëse në të gjitha vatrat aktive, pasojë kjo e terrenit tejet të vështirë. Ekipet e emergjencës po përballen me një situatë tejet komplekse në terren. Era e fortë dhe prania e gjerë e bimësisë, veçanërisht drurët e pishës, po shërbejnë si faktorë favorizues për avancimin e shpejtë të flakëve, duke vështirësuar përpjekjet për neutralizimin e plotë të tyre. Për shkak të konfiguracionit malor dhe mungesës së mundësive për të depërtuar me mjete rrethanore në të gjitha zonat e përfshira nga zjarri, ndërhyrja tokësore mbetet e kufizuar, duke lënë disa vatra aktive. Në këto kushte, banorët vendas kanë ngritur alarmin duke kërkuar mbështetje me ndërhyrje nga ajri. Sipas tyre, ky është i vetmi opsion për të përshpejtuar operacionet e shuarjes dhe për të shmangur një katastrofë më të gjerë mjedisore e materiale. Aktorët institucionalë po e ndjekin situatën në kohë reale, ndërkohë që operacionet në terren vijojnë pandërprerë për vënien nën kontroll të vatrave të mbetura.