Përshkallëzim i rëndë i luftës në Ukrainë, kancelari gjerman Merz vizitë urgjente në Kiev

Konflikti në Ukrainë po hyn në një stad të ri tensionimi, pasi sulmet ruse kundër infrastrukturës së kryeqytetit kanë vënë në shënjestër edhe urat mbi lumin Dniepër. Në këtë situatë, presidenti ukrainas Volodymyr Zelensky ka paralajmëruar kundërpërgjigje të drejtpërdrejta, duke synuar infrastrukturën energjetike ruse. Ura Veriore e Kievit u dëmtua rëndë gjatë një bombardimi ajror nga Rusia, çka solli ndërprerjen e qarkullimit dhe vështirësi të mëdha në komunikimin transportues mes dy brigjeve të Dnieprit. Autoritetet vendase bëjnë me dije se ky sulm pason goditjet e mëparshme ndaj Urës Jugore dhe instalimeve të tjera jetike për qytetin. Në reagimin e tij, presidenti Zelensky theksoi se Kievi do t'i shtojë sulmet ndaj sektorit energjetik në Rusi, duke vënë në fokus rafineritë e naftës. “Me sulmet e tyre ndaj energjisë sonë, ne duhet t’u përgjigjemi ndaj energjisë së tyre. Para së gjithash, rafinerive të naftës: asaj që u sjell atyre para për këtë luftë,” u shpreh ai. Kreu i shtetit ukrainas shtoi se Kievi nuk synon të ndjekë të njëjtën rrugë si Rusia në goditjen e objekteve civile. “Por ne nuk do të përgjigjemi, sigurisht, si ata, duke goditur objekte civile,” shtoi Zelensky. Sipas tij, ky qëndrim vjen si pasojë e një ndryshimi të dukshëm në taktikat e Moskës në prag të stinës së dimrit. Inteligjenca ukrainase ka rënë në gjurmët e dokumenteve që provojnë një strategji të re ruse ndaj objektivave civile dhe infrastrukturore. Në të njëjtën kohë, kancelari gjerman Friedrich Merz ka mbërritur të dielën në Kiev përmes një vizite të paparalajmëruar. Ai shoqërohet nga ministrja e Ekonomisë dhe Energjisë, Katherina Reiche, si dhe nga drejtues të lartë të kompanive të mbrojtjes nga Gjermania. “Sot erdha në Kiev sepse Ukraina ka nevojë për të gjithë mbështetjen tonë në javët e ardhshme,” deklaroi Merz pas mbërritjes në tokën ukrainase. Ai gjithashtu lëshoi një paralajmërim se pasojat e kësaj lufte mund të përhapen përtej kufijve të Ukrainës. “Nëse Rusia nuk ndalet, herët a vonë makina e saj e luftës do të kthehet kundër nesh,” tha ndër të tjera kancelari. Kryeverimtari gjerman pritet të zyrtarizojë një paketë të re ndihme për Kievin, e cila, sipas burimeve zyrtare gjermane, përfshin 1 miliard euro ndihmë ushtarake dhe 350 milionë euro dedikuar rehabilitimit të rrjetit energjetik. Gjatë kësaj vizite gjithashtu synohet finalizimi i marrëveshjeve për prodhimin e përbashkët të dronëve. Vëmendja kryesore do t'i kushtohet krijimit të dronëve interceptues për neutralizimin e mjeteve ajrore ruse me shpejtësi të lartë. Për më tepër, akordet mes korporatave gjermane dhe ukrainase përfshijnë zhvillimin e armatimeve me rreze veprimi mbi 1,000 kilometra. Vizita e lartë e Merzit ndodh në një periudhë kur Moska këmbëngul se do t'i vijë në ndihmë fushatave të saj me sulme hakmarrëse, ndërkohë që Kievi zotohet se nuk do t'i ndalë goditjet ndaj kapaciteteve energjetike ruse. Megjithëse të dyja palët mohojnë se synojnë qëllimisht popullsinë civile, goditjet e fundit kanë shkaktuar dëme katastrofike në infrastrukturën urbane, duke rritur frikën dhe pasigurinë për furnizimin me energji gjatë muajve të dimrit.