Skemë ndërkombëtare mashtrimi: Ngrihet aktakuzë ndaj gjashtë personave në Kosovë

Prokuroria ka dorëzuar një aktakuzë zyrtare ndaj gjashtë personave, të cilët dyshohen për përfshirje në disa vepra penale që lidhen me krimin kibernetik dhe mashtrimin financiar. Të pandehurit B.D., A.D., L.D., G.D. dhe E.D. ballafaqohen me akuzat për “Pjesëmarrja ose organizimi i grupit kriminal të organizuar”, në lidhje me veprat penale “Mashtrimi” dhe “Hyrja e paautorizuar në sistemet kompjuterike”. Ndërkohë, ndaj të pandehurit B.C. rëndon akuza e veçantë për veprën penale “Mashtrimi”. Sipas dosjes hetimore të prokurorisë, pesë personat e parë, gjatë periudhës nga viti 2022 deri në vitin 2024, kanë funksionuar si pjesë e një strukture kriminale me shtrirje ndërkombëtare. Ata dyshohet se kanë operuar nga territori i Republikës së Kosovës, duke shënjestruar dhe dëmtuar shtetas të Republikës Federale të Gjermanisë përmes veprimtarisë së tyre të paligjshme.