Incident me armë zjarri në Ndroq, vihen në pranga katër persona dhe sekuestrohet çifte

Një ngjarje e pazakontë është regjistruar ditën e sotme në zonën e Ndroqit, ku banorët kanë dëgjuar të shtëna armësh, duke ngritur alarmin në zonë. Sipas të dhënave zyrtare paraprake, fatmirësisht plumbat janë qëlluar vetëm në ajër dhe nuk raportohet për persona të dëmtuar apo të plagosur. Forcat e rendit kanë ndërhyrë menjëherë pas njoftimit të marrë në Sallën Operative të Drejtorisë Vendore të Policisë Tiranë, duke ushtruar kontroll të imtësishëm në fshatin Zbarqe të Ndroqit. Gjatë krehjes së terrenit dhe veprimeve të para hetimore, grupi i posaçëm ka bërë të mundur sekuestrimin e një armë gjahu të llojit çifte, si dhe municionit përkatës. Në kuadër të zbardhjes së plotë të rrethanave të këtij incidenti, efektivët kanë shoqëruar në ambientet e komisariatit katër shtetas, ndërkohë që hetimet vijojnë për dokumentimin e plotë ligjor të ngjarjes.