Feraj: PDK po i shfrytëzon të dënuarit për përfitime politike dhe po pengon institucionet

Analisti politik Hysamedin Feraj ka drejtuar kritika të ashpra në drejtim të Partisë Demokratike të Kosovës (PDK), duke e akuzuar atë për qasje dhe veprime të dëmshme lidhur me zhvillimet rreth Gjykatës Speciale dhe procesit të zgjedhjes së presidentit të vendit. Nëpërmjet një shkrimi publik, Feraj ka theksuar se kjo forcë politike, e shtyrë nga synimet elektorale, po zvarrit ngritjen e institucioneve të reja dhe po rrezikon drejtpërdrejt fatin e personave të dënuar, duke i përdorur ata për interesa partiake. Sipas tij, insistimi i PDK-së për të shkuar në zgjedhje të reja, në vend që të finalizohet zgjedhja e presidentit, bazohet në llogaritë se të dënuarit mund t'i sigurojnë mbështetje shtesë elektorale. 1 - "Gjykata jonë e ka dënuar luftën e Kosovës dhe ushtrinë e saj çliritare - po i thotë PDK-ja jo vetëm ambasadorit të UK por gjithë botës." Mos vallë pret t'i përgjigjen: "Ok, atëherë po e tërheqim njohjen e Kosovës shtet të pavarur!" Feraj vë në pah se, në etjen për pushtet dhe vota, kjo parti po anashkalon faktin se lufta dhe pavarësia e vendit janë legjitimuar përfundimisht nga Gjykata Ndërkombëtare e Drejtësisë (GJND), e cila konfirmoi mungesën e çdo shkeljeje të së drejtës ndërkombëtare. 2 - Lidhur me kushtëzimet e kësaj partie, ai përmend qëndrimin e tyre për ndryshimin e ligjit për Gjykatën Speciale para çfarëdolloj hapi tjetër për konstituimin e institucioneve. Sipas tij, kjo strategji vetëm sa ua rëndon pozitën të dënuarve, duke e vonuar mbrojtjen e tyre në shkallën e apelit. Kjo pasi çdo zvarritje apo pezullim i mundshëm deri në një vendim të Gjykatës Kushtetuese të kësaj gjykate, mund t'i rikthejë proceset nga fillimi, duke i lënë ata të burgosur si pasojë e lojërave politike. 3 - Për sa i përket çështjes së presidentit, Feraj shprehet se mesazhi i tyre nënkupton se më mirë të ketë bllokadë sesa zgjidhje, pasi të dënuarit u sjellin vota. Ai e cilëson këtë si sjelljen më egoiste dhe më të ulët ndaj personave që ndodhen prapa grilave: logjika se, meqenëse nuk mund t'i ndihmojnë ata drejtpërdrejt, le t'i ndihmojnë ata partizanët e tyre përmes votës. 4 - Në fund, analisti përmbyll se ky subjekt politik po ushqen shpresa për rritje votash dhe rikthim në pushtet, duke u lutur që opozita e ardhshme të jetë më e butë dhe të mos bllokojë proceset. Sipas tij, e gjithë kjo dinamikë dëshmon se veprimet e PDK-së lënë hapësirë për të kuptuar se më shumë janë gëzuar sesa janë mërzitur nga vendimet ndëshkuese të shkallës së parë të Gjykatës Speciale.