Gjorgjievski paralajmëron shtrëngim të masave: Nuk do të ketë tolerancë për tregtarët ilegalë në Shkup

Aksionet për largimin e shitësve ambulantë dhe vendosjen e rregullit në tregje dhe rrethinat e tyre do të intensifikohen gjatë periudhës së ardhshme, duke u shtrirë jo vetëm në komunën e Çairit, por edhe në pjesë të tjera të kryeqytetit – ka bërë të ditur sot kryetari i Shkupit, Orce Gjorgjievski. Kreu i komunës së Karposhit dhe i kryeqytetit theksoi se tregtarët kanë në dispozicion hapësira të përshtatshme brenda tregjeve zyrtare, ndaj është e papranueshme që tregtia të zhvillohet në bulevarde, trotuarë apo shtigje për biçikleta. Duke iu përgjigjur pyetjeve të gazetarëve në lidhje me operacionet e fundit në zonën e Bit-Pazarit – ku gjatë një aksioni për spastrimin e shitësve ilegalë u sekuestruan rreth 500 kilogramë produkte ushqimore – Gjorgjievski, gjatë inspektimit të punimeve ndërtimore në urën e re në rrugën “Lublanska”, ritheksoi se vendosja e rendit ka qenë prioritet që nga dita e parë e mandatit të tij. “Që nga fillimi i mandatit tim, ajo që përpiqemi të bëjmë në kryeqytet është të vendosim rend. Dhe rendi mungon”, u shpreh Gjorgjievski. Ai vuri në dukje se ndërsa një pjesë e qytetarëve reagojnë pozitivisht ndaj vërejtjeve dhe heqin dorë nga këto dukuri pas një apo dy paralajmërimeve, ka ende nga ata që shkelin rregullat e përcaktuara për zonat e tregtimit. “Dhe ka qytetarë që menjëherë pas një ose dy vërejtjeve dinë të reagojnë dhe të tërhiqen nga dukuri të tilla deviante, do të thosha, që i bëjnë. Të gjithë e dinë se ku është vendi ku duhet të shitet. Askush nuk mund të shesë në mes të bulevardit, në trotuar, në shtegun e biçikletave e kështu me radhë”, shtoi ai. Gjorgjievski sqaroi se aksioni i fundit ishte rezultat i një bashkëpunimi mes Qytetit të Shkupit, ekipeve komunale, Inspektoratit, Agjencisë së Ushqimit dhe Veterinarisë, si dhe Ministrisë së Punëve të Brendshme, ndërsa konfirmoi se këto operacione do të vazhdojnë pa ndërprerje. “Nëse dikush pëlqen të dënohet dhjetë herë për vepër të njëjtë që e përsërit, kjo flet për karakterin e tij, nuk flet për karakterin tonë. Është detyrimi ynë të krijojmë rend. Sa u përket shitësve, ata kanë hapësirë të lirë në tregje dhe e dinë se ku duhet t’i shesin mallrat e tyre ose të gjitha ushqimet që shesin. Kemi disa tregje, por kemi edhe veprime jo vetëm në Çair, veprojmë edhe në Kisella Vodë në afërsi të tregut, veprojmë edhe në Qendër në afërsi të tregjeve, kështu që do të veprojmë kudo. Duhet të ketë rend në qytet. Dhe tolerancën ndaj këtij lloji të fenomenit, të paktën unë nuk e respektoj dhe nuk do të lejoj që të përsëritet në të ardhmen”, theksoi kryetari. Duke folur për Qendrën Shelter të Postës, Gjorgjievski bëri të ditur se ky objekt do t'i nënshtrohet një rijetësimi dhe do t'i dedikohet të rinjve, në kuadër të iniciativës “Shkupi – Qyteti kryeqendër e kulturës”. “Ky është një nga projektet që besojmë se do ta aftësojmë të jetë objekt për të rinjtë në kuadër të projektit Shkupi – Qyteti kryeqendër e kulturës, në të cilin edhe ne do të kemi investime të caktuara”, deklaroi ai. Kryetari informoi gjithashtu se Qeveria, përmes dikasterit të transportit, po bashkëfinancon punimet për rindërtimin e çatisë së kësaj ndërtese. “Ky ishte një vend të cilin, siç ju kujtohet, një zëvendëskryeministër në të kaluarën, por edhe bashkëpunëtorët e tij, donin ta përdornin për dedikim tjetër anormal – kabare apo klub, nuk e di saktësisht se si ishte”, u shpreh ai, duke vlerësuar se tashmë objekti po merr destinacionin e duhur në shërbim të rinisë.