“Mjaft më me manipulime” – Çun Lajçi shpërthen me kritika të ashpra ndaj partive dhe protestave

Aktori dhe publicisti i njohur, Çun Lajçi, ka ngritur zërin përmes një reagimi të ashpër ndaj zhvillimeve të fundit politike dhe protestave të organizuara rreth Gjykatës Speciale, duke i akuzuar subjektet politike për keqpërdorim të figurës së ish-pjesëtarëve të UÇK-së për përfitime partiake. Lajçi ka bërë thirrje të prerë për ndalimin e këtyre protestave, duke nënvizuar se askush nuk mund të jetë mbi shtetin dhe se forcat politike duhet domosdoshmërisht të bashkëpunojnë për të siguruar funksionalizimin e institucioneve të vendit, shkruan portali ynë informativ. "Boll keni protestu, boll keni rrejtë, boll keni mashtru! Ndaluni, se Kina u knaq tue shitë plisa të bardhë sintetikë e kasketa me simbolet e UÇK-së", është shprehur ai në shkrimin e tij, duke shtuar se edhe Turqia është mbushur me të ardhura nga prodhimi i flamujve, shallave dhe simboleve të tjera patriotike për qëllime fitimi. Publicisti ka kujtuar deklaratat e Nasim Haradinajt, të burgosurit para katërshes, i cili sipas tij u ka folur hapur protestuesve, duke i akuzuar se në vend të brengës për çlirimtarët, interesi i tyre i vetëm mbetet sigurimi i votave për partitë. Ai ka kritikuar gjithashtu logjikën politike që përpiqet të barazojë një votë për një parti me votën për çlirimtarët. Sipas Lajçit, asnjë individ nuk qëndron mbi shtetin, qofshin ata edhe katër persona në Hagë apo të tjerët, pasi në të kundërtën nuk bëhet fjalë për shtet ligjor, por për struktura që i përshtatin ligjet për interesat e tyre. Në fund të reagimit të tij, ai ka përsëritur thirrjen e Nasim Haradinajt se partitë duhet të bëhen bashkë për të zgjedhur presidentin dhe për të zhbllokuar vendimmarrjen shtetërore, duke shtuar se protesta të tilla nuk kanë legjitimitet pa u udhëhequr nga vlera e lartë e Gjeneral Adem Jasharit dhe familjes Jashari.