Bedri Hamza: Mbrojtja e krerëve të UÇK-së dhe e së vërtetës historike kërkon reagim shtetëror urgjent

Kreu i Partisë Demokratike të Kosovës, Bedri Hamza, ka bërë thirrje që institucionet vendase të ndërmarrin hapa të menjëhershëm pas vendimit të dhënë më 16 shtator në Hagë, duke e cilësuar mbrojtjen e ish-liderëve të Ushtrisë Çlirimtare të Kosovës si një çështje parësore për shtetin. Gjatë mbledhjes së Këshillit Drejtues të PDK-së, Hamza vlerësoi se mbrojtja e figurave kryesore të UÇK-së dhe mbrojtja e luftës çlirimtare nga çdo përpjekje për tjetërsim duhet të jenë në krye të agjendës shtetërore dhe partiake. “Hashim Thaçit, Kadri Veselit, Jakup Krasniqit, Rexhep Selimit dhe bashkëluftëtarëve të tyre u është bërë një padrejtësi e madhe. Aktgjykimi ndaj tyre është i padrejtë, i papranueshëm dhe i ndikuar politikisht. Përgjegjësia jonë e parë është që të mos i lëmë vetëm”, u shpreh ai. Sipas tij, ky angazhim duhet të zhvillohet në rrugë institucionale dhe ligjore, me qëllim që t'u sigurohet atyre përfaqësimi më cilësor në fazat e ardhshme të gjykimit. Hamza shtoi se vendimi në fjalë mbart peshë politike e historike, ndaj Kosova duhet të kundërpërgjigjet përmes dokumenteve, fakteve, veprimit institucional dhe diplomacisë. “UÇK-ja dhe Perëndimi ishin aleatë në vitin 1999. Shtetet e Bashkuara të Amerikës, NATO-ja dhe aleatët tanë perëndimorë ishin pjesë e përpjekjes së përbashkët që i dha fund luftës dhe hapi rrugën për lirinë e Kosovës. Prandaj, çdo deformim i historisë së luftës sonë prek edhe historinë e kësaj aleance”, theksoi kreu i PDK-së. Duke u ndalur te nisma legjislative e partisë së tij, Hamza sqaroi se projektligji i propozuar synon ristrukturimin e mandatit të Dhomave të Specializuara dhe jo mbylljen e tyre. Sipas këtij propozimi, lëndët që nuk kanë lidhje me pretendimet e dala nga raporti i Dick Martyt parashihet të kalojnë në sistemin vendor të drejtësisë, së bashku me provat dhe dosjet përkatëse. Po ashtu, nisma parashikon mundësinë që organizata ndërkombëtare të pavarura dhe profesionale të monitorojnë standardet e gjykimit, kohëzgjatjen e procesit, kushtet e mbajtjes në paraburgim dhe garantimin e të drejtave të njeriut. Hamza bëri të qartë se kjo nismë nuk paragjykon dhe nuk ndërhyn në fazën aktuale të procesit gjyqësor, e cila vijon deri në përfundim të shkallës së Apelit. “Tani duhet të veprohet edhe si shtet. Kuvendi duhet ta bëjë pjesën e vet. Qeveria duhet ta bëjë pjesën e vet. Edhe PDK-ja do ta bëjë pjesën e vet”, deklaroi ai. Në përmbyllje të fjalës së tij, kryetari i PDK-së ftoi qytetarët që të bashkohen në protestën e thirrur për 1 tetor në Prishtinë, duke nisur nga ora 16:00. “Le ta ngrisim bashkë zërin kundër padrejtësisë më 1 tetor”, u shpreh Hamza. Mbledhja e Këshillit Drejtues të PDK-së nisi me një minutë heshtje në nderim dhe kujtim të jetës e kontributit të intelektuales dhe humanistes Flora Brovina, e cila u nda nga jeta pak ditë më parë.