Mitrovicë: Të dielën ndërprerje e energjisë në spital, vihet në punë gjeneratori i ri

Spitali i Përgjithshëm “Dr. Sami Haxhibeqiri” në Mitrovicë ka njoftuar opinionin publik se gjatë ditës së diel do të ketë një ndërprerje të planifikuar të energjisë elektrike. Sipas njoftimit zyrtar, stakimi i rrymës do të shtrihet në intervalin kohor prej orës 09:00 deri në orën 12:00. Kjo ndërhyrje vjen si nevojë për realizimin e montimit dhe testimit të gjeneratorit të ri, me të cilin ky institucion shëndetësor është pajisur së fundmi. Ky investim i rëndësishëm ka për qëllim garantimin e një furnizimi të qëndrueshëm dhe të pandërprerë me energji elektrike, duke shmangur çdo problem të mundshëm në rast të defekteve apo reduktimeve në rrjetin elektrik. Për t'i dalë në ndihmë pacientëve dhe për të mbrojtur shëndetin e tyre, administrata e spitalit ka njoftuar se janë ndërmarrë të gjitha masat e duhura teknike dhe organizative, në mënyrë që ky proces të mos lë pasojë në kujdesin mjekësor. “Punët në reparte do të vijojnë dhe asnjë shërbim për pacientët nuk do të cenohet”, theksohet në komunikatën e lëshuar nga Spitali i Përgjithshëm në Mitrovicë.