Gjendja në rrugë: Qarkullim pa pengesa dhe pa kolona në pikat kufitare

Lidhja Auto-Moto e Maqedonisë (LAMM) bën të ditur se qarkullimi në të gjitha akset rrugore të vendit po zhvillohet rregullisht, në kushte të motit të mirë dhe në rrugë kryesisht të thata. Megjithatë, jashtë zonave urbane vërehet një shtim i intensitetit të trafikut. Ndërkohë, në pikat kaluese kufitare, fluksi është normal dhe nuk regjistrohen pritje apo vonesa të gjata për udhëtarët që hyjnë dhe dalin nga territori i vendit. Për siguri më të madhe në rrugë, LAMM apelon për respektim të rreptë të rregullave të qarkullimit, ruajtje të shpejtësisë së lejuar dhe kujdes të shtuar gjatë drejtimit të mjetit. Kjo këshillë vlen veçanërisht për pjesët rrugore që kalojnë përgjatë luginave, grykave malore dhe shtretërve të lumenjve, ku rreziku i shembjeve të dheut dhe gurëve mbetet prezent. Kujdes i veçantë kërkohet gjatë kalimit të segmenteve kritike si Katllanovë-Veles, Mavrovë-Dibër-Strugë, Vinicë-Berovë dhe Koçan-Dellçevë.