Kërcënoi pronarin e një karburanti me eksploziv fals për 50 mijë euro, vihet në pranga 21-vjeçari në Dibër

Një ngjarje e pazakontë ka tronditur Dibrën, ku një i ri vetëm 21 vjeç është vënë në pranga nga uniformat blu, pasi dyshohet se ka tentuar t'i zhvatë 50 mijë euro pronarit të një pike karburanti, duke përdorur një mjet të improvizuar që ngjante me një bombë të telekomanduar. Operacioni policor i koduar “Kërcënimi” është finalizuar me sukses këtë të shtunë, falë një reagimi të shpejtë dhe hetimeve intensive të ndërmarra nga shërbimet e Komisariatit të Policisë Dibër, në bashkëpunim të ngushtë me Sektorin për Hetimin e Krimeve të Rënda dhe forcat Operacionale të DVP Dibër, të cilët bënë të mundur identifikimin dhe arrestimin në flagrancë të autorit të dyshuar, shtetasit E. K., 21 vjeç. Ngjarja ka ndodhur ditën e djeshme, rreth orës 14:30, kur i riu ka lënë në ambientet e biznesit në pronësi të shtetasit Z. Sh. një kuti të dyshimtë. Mbi të kish vendosur një ekran, elementë elektronikë dhe tela, me qëllim që të krijonte bindjen se bëhej fjalë për një mekanizëm shpërthyes të telekomanduar. Bashkë me kutinë, ai kishte lënë edhe një mesazh me shkrim ku kërkonte pagesën prej 50 000 eurosh në formë gjobe, e cila duhet të transferohej përmes një pike këmbimi të kriptomonedhave në një adresë të përcaktuar prej tij. Për shkak të rrezikshmërisë së lartë, në vendngjarje u thirrën menjëherë forcat speciale xheniere të RENEA-s, të cilët pas ndërhyrjes dhe kontrollit të imtësishëm zbuluan se brenda kutisë nuk kishte asnjë lëndë plasëse. Në letrën e tij kërcënuese, autori kishte vënë kushte të rrepta, duke paralajmëruar se mjeti do të shpërthente nëse nuk paguhej shuma brenda afatit, nëse kutia lëvizej, apo nëse pronari guxonte të njoftonte Policinë ose persona të tjerë. Ai gjithashtu mashtronte duke pretenduar se brenda kishte lëndë eksplozive C4, se ajo ishte e pajisur me sensorë lëvizjeje dhe telekomandë, dhe se i gjithë ambienti po vëzhgohej përmes kamerave. Për këtë rast, materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Dibër, ku 21-vjeçari do të ballafaqohet me veprën penale “Shtrëngimi me anë të kanosjes ose dhunës për dhënien e pasurisë”. Ndërkohë, nën drejtimin e organit të akuzës, vijojnë hetimet për të zbardhur plotësisht rrethanat e ngjarjes dhe për të verifikuar nëse ka persona të tjerë të përfshirë në këtë skemë zhvatjeje.