"Jo në emrin tim": Diaspora organizon protesta në Gjermani, Zvicër e Suedi në mbështetje të ish-krerëve të UÇK-së

Mërgata shqiptare në Evropë po mobilizohet përmes tubimeve paqësore nën moton "Jo në emrin tim". Ky reagim vjen si vazhdimësi e pakënaqësive të shprehura lidhur me proceset gjyqësore ndaj ish-krerëve të Ushtrisë Çlirimtare të Kosovës (UÇK). Sipas njoftimit të bërë publik nga platforma "Liria ka Emër", marshimet dhe tubimet protestuese janë planifikuar të mbahen në disa qytete të rëndësishme evropiane, konkretisht në Mynih, Aachen, Lozanë dhe Malmo, ku qytetarët do të bashkohen për të përcjellë mesazhin e tyre të prerë. Në Gjermani, tubimi në qytetin e Mynihut është caktuar të nisë në orën 17:30. Po ashtu, një thirrje e ngjashme për bashkim dhe solidarizim u është drejtuar bashkatdhetarëve edhe në Aachen, ku organizatorët kanë ftuar të gjithë shqiptarët që të bëhen pjesë e këtij organizimi nën të njëjtën moto. Ndërkohë, në Lozanë të Zvicrës, thirrja u është bërë bashkëkombësve që të mblidhen "bashkë e njëzëri" në shenjë proteste. Në anën tjetër, në qytetin suedez të Malmos, aktiviteti është paralajmëruar të fillojë më herët, duke nisur nga ora 14:00. Këto organizime në diasporë janë pjesë e një vale reagimesh në mbarë botën në përkrahje të ish-krerëve të UÇK-së. Ky reagim qytetar u nxit pas vendimit të Gjykatës Speciale në Hagë, e cila dënoi me gjithsej 81 vjet burgim katër ish-udhëheqësit e UÇK-së: Hashim Thaçin, Kadri Veselin, Rexhep Selimin dhe Jakup Krasniqin.