Përgatitjet e Dinamos gjatë pauzës kombëtare, fokusi te rikthimi i plotë dhe sfida me Vllazninë

Teksa futbollistët e angazhuar me ekipet kombëtare janë në pritje të përmbylljes së angazhimeve të tyre, stafi teknik i Dinamos po vijon seancat stërvitore me grupin e mbetur, me synimin për të arritur një organikë sa më të plotë në prag të ndeshjeve të ardhshme kampionatore. Aktualisht, klubi kryeqytetas numëron tre lojtarë të ekipit të parë që i janë përgjigjur thirrjes së përfaqësueseve respektive. Bëhet fjalë për Naser Alijin dhe Klevi Qefalijën, të cilët janë grumbulluar nga Shqipëria, ku mesfushori Qefalija ka regjistruar edhe debutimin e tij të parë me fanellën kuqezi. Ndërkohë, Hekuran Berisha është vënë në dispozicion të Kosovës U21, duke lënë gjurmë edhe me një gol të shënuar në ndeshjen e zhvilluar së fundmi. Pavarësisht mungesave, ritmi i punës mbetet i lartë dhe skuadra pritet të bashkohet plotësisht vetëm tre ditë para duelit të radhës kundër Vllaznisë, periudhë gjatë së cilës lojtarët po marrin ngarkesën e nevojshme fizike edhe nën fanellat e përfaqësueseve. Në ambientet e klubit dinamovit mbizotëron dëshira që ky grumbullim të mbyllet pa dëmtime për futbollistët e huazuar në kombëtare, por edhe për pjesën tjetër të grupit që po stërvitet rregullisht dhe që do të ketë një test miqësor ndaj Ilirisë për të ruajtur ritmin e lojës. Kujtojmë se supersfida e kampionatit ndërmjet Vllaznisë dhe Dinamos është planifikuar të luhet të dielën, në stadiumin e njohur "Loro Boriçi".