De la Fuente thur eloda për Lamine Yamal para duelit me Republikën Çeke: Është kënaqësi ta shohësh

Kombëtarja e Spanjës po përgatitet intensivisht për sfidën e radhës ndaj Republikës Çeke, ndërsa trajneri Luis de la Fuente ka dalë para mediave për të diskutuar rreth gjendjes së skuadrës dhe planeve taktike, duke i kushtuar vëmendje të veçantë talentit Lamine Yamal. Duke folur për yllin e ri të Barcelonës, strategu spanjoll ka shprehur admirimin e tij, duke vënë në pah progresin e vazhdueshëm në aspektin e pjekurisë së 19-vjeçarit. “Çdo ditë është më i pjekur. Është kënaqësi ta shohësh. Ai është një person që pranon çdo propozim dhe është një lajm shumë i mirë për ne”, deklaroi trajneri spanjoll. Edhe pse nuk ka zbuluar zyrtarisht nëse Yamal do të jetë pjesë e formacionit startues, De la Fuente ka lënë të kuptohet se zgjedhja do të bazohet te kontributi maksimal që ai mund t'i sjellë ekipit në fushë. “Nëse e aktivizojmë që nga fillimi, është sepse besojmë se pikërisht atëherë mund të jetë më ndikues. E kemi në mendje, por sonte do të marrim vendimet e fundit”, u shpreh ai. Sa i përket mundësisë së ndryshimeve në skuadër, tekniku theksoi se mirëqenia fizike e lojtarëve mbetet fokusi kryesor i stafit teknik. “E meta e këtij formati është se kemi pak kohë për rikuperim. Ne vendosim shëndetin e lojtarit mbi gjithçka dhe preferojmë që ai të jetë në gjendje perfekte”, tha trajneri. Duke analizuar kundërshtarin e radhës, De la Fuente ka bërë thirrje për kujdes maksimal, duke e cilësuar përballjen si një sfidë plot sfida të fshehta. “Nuk ka ndeshje të lehta. Duhet të jesh në nivelin më të lartë në çdo takim. Është një kundërshtar shumë i vështirë dhe mund të jetë një kurth për ata që nuk e njohin. Por ne nuk do të befasohemi”, deklaroi De la Fuente. Në fund, ai bëri edhe një koment lidhur me Santi Denian dhe Pablo Amon, me të cilët ka bashkëpunuar në të kaluarën. “Na njohin shumë mirë, por janë lojtarët ata që ndryshojnë ndeshjet. Ata e dinë mënyrën si luajmë, por nuk është e lehtë të na mbrosh”, përfundoi ai.