Haziri kritikon ashpër shkarkimin e Isufajt: Shteti kërkon shpresë, jo largim të figurave kyçe të drejtësisë

Nënkryetari i Lidhjes Demokratike të Kosovës, Lutfi Haziri, ka reaguar ashpër ndaj vendimit për shkarkimin e Blerim Isufajt nga pozita e Kryeprokurorit të Prokurorisë Speciale të Kosovës, duke theksuar se institucionet nuk duhet të bien pre e një mentaliteti parti-shtet. Haziri e ka cilësuar Isufajn si një ndër luftëtarët më të mëdhenj kundër korrupsionit dhe mbrojtës të shtetit të së drejtës. Sipas tij, vendime të tilla nuk i shërbejnë vendit, i cili aktualisht ka nevojë për besim dhe perspektivë, e jo për spastrime të zyrtarëve më autoritativë brenda sistemit të drejtësisë. Sipas zyrtarit të LDK-së, kjo praktikë qeverisëse ka nisur para gjashtë vitesh me shkarkimin e ish-kryetares së Komisionit Qendror të Zgjedhjeve, Valdete Daka, për të vazhduar më pas me ndryshimet në bordet e ndërmarrjeve publike, komisionet e pavarura, Këshillin Gjyqësor të Kosovës, shërbimin diplomatik, deri te Agjencia e Kosovës për Inteligjencë. Ai ka vënë inatin politik në pah edhe lidhur me kohën se kur është marrë ky vendim, duke potencuar se ky zhvillim ndodh pikërisht në momentin kur po pritej një zgjidhje për një president konsensual në vend.