Vëmendje te rinjtë, Llapi promovon katër shpresat e akademisë në ekipin e parë

Klubi i futbollit Llapi ka ndërmarrë një hap të rëndësishëm për të ardhmen e tij, duke afruar katër prej lojtarëve më të dalluar të gjeneratës U19 në skuadrën seniore, të cilët kanë nisur tashmë seancat stërvitore nën urdhërat e trajnerit kryesor, Tahir Batatina. Ky vendim ka ardhur si rezultat i kërkesës së drejtpërdrejtë të trajnerit Batatina dhe drejtorit sportiv, Besar Musolli. Pjesë e grupit të parë janë bërë qendërmbrojtësi Erion Kaçiu, mesfushori Enxhull Mulolli, si dhe dy sulmuesit e talentuar, Brilant Kika dhe Arion Salihu. Nëpërmjet një njoftimi zyrtar, drejtuesit e klubit llapjan kanë bërë të dytur se ky hap shënon vetëm fillimin e një strategjie afatgjatë, e cila do të ndiqet rregullisht edhe në të ardhmen. “Kjo praktikë do të jetë e vazhdueshme, me synim që talentët e Akademisë të kenë mundësinë të zhvillohen pranë ekipit të parë, të fitojnë përvojë dhe gradualisht të bëhen pjesë e strukturës së ekipit senior”, ka deklaruar klubi. Në fund, nga radhët e Llapit është ritheksuar se Akademia vazhdon të mbetet vatra kryesore e prodhimit të lojtarëve për skuadrën e parë, ndërsa përkushtimi ndaj rritjes dhe zhvillimit të gjeneratave të reja mbetet ndër prioritetet kryesore të klubit.