Një muaj pa Laurent Krasniqin, miku i tij i ngushtë, Egzoni, e kujton me një dedikim prekës

Plaga e mungesës dhe dhimbja e madhe mbeten të pashuara për rrethin shoqëror të të ndjerit Laurent Krasniqi. Sot janë bërë saktësisht tridhjetë ditë që nga dita kur ai u nda nga jeta, duke lënë pas një boshllëk të pazëvendësueshëm për familjarët, miqtë dhe të afërmit e tij. Përmes një postimi në rrjetet sociale, shoku i tij i ngushtë, Egzoni, ka ndarë me ndjekësit disa momente në formë fotografish ku shihet Laurenti bashkë me miqtë e tyre, të shoqëruara me fjalë zemre dhe mjaft emocionuese për kujtimin e tij. "Laurent, vëllai ynë, miku ynë i zemrës, sot u bë një muaj pa ty. Gjithmonë do të të kujtojmë kështu, të buzëqeshur, siç je në këtë fotografi. Allahu të mëshiroftë e na bashkoftë në Xhenet, inshallah. Do të mbetesh gjithmonë në zemrat tona, vëlla," ka shkruar Egzoni në mesazhin e tij përkujtimor. Në fotografitë e publikuara, i ndjeri Laurenti shfaqet i rrethuar nga shoqëria e tij më e ngushtë, me një buzëqeshje të ngrohtë në fytyrë, duke dëshmuar kujtimet e bukura dhe të pashlyeshme që ka lënë te të gjithë ata që patën fatin ta njihnin nga afër.