Kryeministri Rama thirrje demokratëve amerikanë: Mos zgjidhni Shqipërinë për t’u hakmarrë ndaj Trumpit

Kryeministri i Shqipërisë, Edi Rama, ka përcjellë një mesazh me ton ironik dhe miqësor drejtuar demokratëve në Shtetet e Bashkuara, lidhur me tubimet e vazhdueshme të njohura ndryshe si “revolucioni i flamingove”, të cilat kundërshtojnë një nismë për ngritjen e një kompleksi turistik luksoz të mbështetur nga Jared Kushner, dhëndri i ish-presidentit Donald Trump. Ajo që nisi fillimisht si një reagim kundër këtij investimi është shndërruar në tubime më të gjera antiqeveritare, të cilat tashmë kanë mbërritur në ditën e tyre të 124-të radhazi, duke marrë vëmendje të theksuar edhe nga mediat ndërkombëtare. Gjatë një interviste për gazetën gjermane “Ëelt am Sonntag”, e cila së bashku me “Politico” operon nën rrjetin “Global Reporters Netëork” të sipërmarrjes Axel Springer, kreu i ekzekutivit shqiptar e ka lidhur këtë vëmendje mediatike me ndikimin e vazhdueshëm të Donald Trumpit. “U kam thënë miqve të mi demokratë në Amerikë që, nëse nuk arrini ta mundni Trumpin në Amerikë, mos vini në Shqipëri për t’u hakmarrë. Kjo nuk është e drejtë”, u shpreh ndër të tjera ai. Investitori Jared Kushner është i përfshirë në një plan shumëmiliardësh për ndërtimin e një resorti ekskluziv në ishullin e pabanuar të Sazanit, dikur bazë ushtarake sovjetike në jug të vendit, si dhe në një zonë bregdetare ngjitur me të, e cila shtrihet pranë një ekosistemi të mbrojtur ku strehohen flamingot, pelikanët dhe lloje të ndryshme të faunës ligatinore. Këto plane nxitën reagime dhe protesta kombëtare e ndërkombëtare që nga fundi i muajit maj, me tubime që organizohen çdo mbrëmje përballë zyrave të kryeministrit në Tiranë. Lëvizja qytetare ka ngjallur interes të gjerë, duke u pasqyruar edhe në një rezolutë të Parlamentit Evropian, ndërkohë që në mbështetje të saj janë angazhuar marka e njohur e veshjeve “Patagonia” dhe këngëtarja me origjinë nga Kosova, Dua Lipa. Duke sqaruar detajet e projektit, Rama theksoi se plani përfshin dy zona: ishullin e Sazanit, ku do të preket vetëm 8% e sipërfaqes si pronë publike, dhe një gadishull tjetër në pronësi private. Në krahun tjetër, qytetarët protestues e kundërshtojnë ashpër këtë nismë, duke përmendur rreziqet mjedisore dhe mungesën e konsultimeve transparente me publikun. Ndërkohë, Prokuroria e Posaçme kundër Korrupsionit dhe Krimit të Organizuar (SPAK), një strukturë e mbështetur fuqimisht nga Shtetet e Bashkuara dhe Bashkimi Evropian, ka nisur hetimet për të verifikuar nëse një biznesmen vendas ka falsifikuar dokumentet e pronësisë për tokën private. Ish-pronari i tokës i ka hedhur poshtë akuzat për shkelje të ligjit, ndërsa një përfaqësues i investitorëve, përfshirë edhe Kushnerin, nuk ka kthyer përgjigje ndaj kërkesave për komente deri në çastin e publikimit të lajmit. Duke hedhur poshtë thirrjet e protestuesve me parulla si “Shqipëria nuk është në shitje” dhe “Shqipëria për shqiptarët”, shefi i qeverisë shtroi pyetjen: “Nëse do të sillnit kapital të huaj në Gjermani, a do të thoshit se Gjermania po shitej?”. “Unë përfaqësoj interesat e vendit tim dhe do të vazhdoj ta bëj këtë”, u shpreh ai, duke shtuar gjithashtu se bisedimet rreth këtij projekti vazhdojnë ende dhe se do të kryhen vlerësime të plota të ndikimit në mjedis, sipas agjencisë zyrtare të lajmeve ATSH. Në një konferencë të përbashkët për shtyp në kryeqytet, të mërkurën, krah presidentes së Komisionit Evropian, Ursula von der Leyen, kryeministri Rama dha garanci se qeveria që ai drejton do të ndriçojë çdo hije dyshimi, duke siguruar transparencë maksimale për të gjithë dokumentacionin e kësaj nisme të debatuar gjerësisht. Përderisa në selinë e qeverisë po zhvilloheshin takimet me zyrtaren e lartë të Bashkimit Evropian, qindra qytetarë u mblodhën në një protestë jashtë institucionit, duke mbajtur në duar pankarta me mbishkrimin “Jo BE me Ramën”.