Haradinaj shpërthen ndaj shkarkimit të Blerim Isufajt: Erë e keqe e hakmarrjes politike

Kryetari i AAK-së, Ramush Haradinaj, ka reaguar ashpër lidhur me zhvillimet rreth shkarkimit të kryeprokurorit të Shtetit, Blerim Isufaj, duke e cilësuar këtë vendim si një veprim me prapavijë politike. Sipas Haradinajt, ky vendim ngre pikëpyetje të mëdha dhe mban erë të keqe, e cila, siç u shpreh ai, u ndie qartë në ditën kur kreu i ekzekutivit lëshoi akuza ndaj kryeprokurorit nga foltorja e Kuvendit, duke marrë në mbrojtje personat e dyshuar për korrupsion. Lideri i AAK-së ka paralajmëruar se askush nuk do të mund t'i shpëtojë llogaridhënies para ligjit. Ai theksoi se herët a vonë do të vijë koha kur individët që tentojnë të mbrohen përmes shkarkimeve do të ballafaqohen me drejtësinë e vërtetë. Duke e vënë theksin te mungesa e parimeve demokratike, Haradinaj vlerësoi se e gjithë kjo situatë nuk ka asnjë lidhje me sundimin e ligjit, por përbën një hakmarrje të hapur politike ndaj çdo zyrtari që guxon të ruajë pavarësinë e institucioneve të drejtësisë. Në fund të reagimit të tij, Haradinaj ka përsëritur thirrjen se procesi i luftimit të korrupsionit duhet të jetë plotësisht i mbrojtur dhe i pandikuar nga ndërhyrjet apo interesat e ditës të politikës.