“U ngjita me forcë në skenë” – Nasim Haradinaj zbulon prapaskenat e marshit në Prishtinë dhe tensionet me organizatorët

Nasim Haradinaj ka pranuar publikisht se gjatë marshi të organizuar ditë më parë në kryeqytet, ai është detyruar të ngjitet në foltore pa qenë fare pjesë e agjendës zyrtare të përcaktuar nga organizatorët. Gjatë një interviste televizive, Haradinaj sqaroi se fjalimi i tij nuk ishte parashikuar nga strukturat organizative, gjë që e detyroi atë të ndërhynte me forcë për t'iu drejtuar qytetarëve të pranishëm. “Unë nuk kam hyrë spontanisht, por kam hyrë bashkë me dhunë. Fjala më është cenuar që nga dita e parë e protestave dhe deri tash asnjëherë nuk më është dhënë. Atë ditë fjalën e kam marrë me dhunë, me zor kam hipur në skenë, përkundër organizatorëve. Unë kam treguar që ditën e parë se as nuk kam qenë organizator, por jam përkrahës i popullit tim, aty ku unë shoh që politika po do ta orientojë gabimisht. Ata që deshën të ma ndalin fjalimin dhe që kurrë nuk më thanë ta marr fjalën, tashmë e kanë marrë një leksion që në të ardhmen të mos mundohen të nxjerrin lidership të ri”, deklaroi ai ndër të tjera. Ndërkohë, në hapësirën mediatike është bërë publike një video-incizim që dëshmon momentet e tensionuara dhe debatin e ashpër mes Nasim Haradinajt dhe Ismail Tashollit, i cili është një nga organizatorët e platformës “Liria ka emër”.