Nis epoka e Rolando Maran te Shqipëria: Krenar për debutimin, s’ka frikë nga Bjellorusia

Këtë të nesërme merr jetë zyrtarisht rrugëtimi i Rolando Maran në krye të stolin teknik të Kombëtares Shqiptare të futbollit. Në sfidën e parë, kuqezinjtë do të maten me Bjellorusinë, një kundërshtar që mbërrin në këtë përballje i fortë pas gjashtë takimesh radhazi pa humbje, por ky detaj shërben vetëm si shtysë shtesë për grupin tonë. Gjatë konferencës për shtyp para këtij takimi, tekniku italian u ndal te faza përgatitore, forma fizike e grupit, zgjedhjet alternative që ka testuar gjatë javës, si dhe emocionet e këtij starti të ri. “Bjellorusia është një ekip i organizuar dhe kompakt, që po kalon një moment shumë të favorshëm. Ne kemi respektin maksimal për ta, por vëmendja ime mbetet e përqendruar te skuadra ime. Kemi bërë një punë të shkëlqyer, pasi gjetëm menjëherë motivimin e duhur, që mbetet edhe elementi kyç për mua”, deklaroi Maran. Strategu italian nuk e fsheu aspak emocionin për këtë ndeshje të parë zyrtare me kuqezinjtë, ndërsa pranoi se ka pasur disa shqetësime të vogla fizike te disa nga futbollistët. “Është e vërtetë se nesër nis zyrtarisht aventura ime me Shqipërinë, ndaj ndihem i emocionuar dhe krenar. Kjo ndjesi të jep forcë për të dhënë më shumë se në rrethana normale. Pavarësisht problemeve fizike të disa lojtarëve, kushdo që do të zbresë në fushë do të japë maksimumin dhe unë kam besim të plotë te ta”, u shpreh ai. Një nga pikëpyetjet e ngritura kishte të bënte me gjendjen e Kristjan Asllanit dhe Amir Shehut. Maran konfirmoi se të dy do t'i bashkohen rregullisht stërvitjes, ndërsa nuk përjashtoi mundësinë që jo të gjithë të jenë të gatshëm për të përballuar 90 minuta lojë. “Duke qenë se disa elementë nuk ishin në formën e tyre ideale, kam provuar skema dhe alternativa të ndryshme. Asllani dhe Shehu sot stërviten normalisht. Kemi punuar fort gjatë gjithë javës intensive dhe lojtarët u përgjigjën shkëlqyeshëm. Jam optimist se të gjithë do të jenë të gatshëm, ndoshta jo për të gjithë ndeshjen, por do të përbëjnë opsione të vlefshme”, shtoi trajneri. Pas disa muajsh kontakte të vazhdueshme me lojtarët e Kombëtares, italiani theksoi se tashmë e njeh shumë më mirë grupin dhe veçoritë e gjithsecilit, ndërsa theksoi se përzgjedhjet janë bërë bazuar vetëm te forma aktuale. “Natyrisht që tani i njoh në rrënjë. Gjatë këtyre muajve, përtej grumbullimeve, kam pasur mundësi të takohem dhe të flas me ta. Situata ka ndryshuar krahasuar me fillimin dhe njoh mirë karakteristikat e secilit prej tyre. Megjithatë, duhet kuptuar se lojtarët kalojnë faza të ndryshme, si pozitive ashtu edhe negative. Nuk po përmend emra, por kam thirrur ata që janë në gjendjen më të mirë dhe i përshtaten vizionit tim. Ju siguroj se kemi punuar shumë në këtë drejtim”, tha Maran. Përballë do të jetë një Bjellorusi që vjen në formë të shkëlqyer, por Maran kërkon që kjo e dhënë të mos e cënojë aspak qasjen e Shqipërisë në fushë. “Bjellorusia vjen nga një e ecur mjaft pozitive me gjashtë rezultate pozitive radhazi, por për ne kjo duhet të shërbejë thjesht si një motivim. E respektojmë kundërshtarin, por duhet të jemi më të përqendruar dhe më të vendosur për të arritur objektivin tonë”, përfundoi trajneri kuqezi.