Dështon ekzekutimi i Christa Pike në SHBA: Amerikanja mbijeton pas dy dozave të helmit dhe dërgohet në spital

Ekzekutimi i Christa Pike në shtetin amerikan të Tennessee-s dështoi, pasi ajo i mbijetoi administrimit të dy dozave të pentobarbitalit dhe u transferua urgjentisht në spital. Dëshmitarët e pranishëm në vendngjarje kanë bërë publike detajet rrëqethëse nga ajo që ndodhi brenda dhomës së ekzekutimit gjatë orëve të ankthit. Pike, e cila sot është 50 vjeçe, po vujnte dënimin kapital për kidnapimin, torturimin dhe vrasjen makabre të 19-vjeçares Colleen Slemmer, ngjarje kjo e regjistruar në vitin 1995, kur autoret kishin vetëm 18 vjet. Ajo ishte parashikuar të bëhej gruaja e parë që ekzekutohej në Tennessee pas një periudhe prej më shumë se dy shekujsh. Sipas dëshmive të mbledhura në vendngjarje, Pike u sigurua në barelë me një kateter intravenoz në krah. Në orën 19:27, autoritetet e burgut hapën perden që ndante dhomën e ekzekutimit nga dëshmitarët zyrtarë, ndërsa tre minuta më vonë asaj iu dha mundësia për fjalën e fundit. “Jam gati të jem e lirë. Kjo është një ditë e lumtur”, u shpreh ajo pa shfaqur shenja paniku. Gjatë minutave në vijim, këshilltari i saj shpirtëror qëndroi pranë saj duke i folur dhe duke kënduar një këngë me refrenin “Të dua”. E dënuara lëvizte kokën, shikonte përreth dhe buzëqeshte, por në një moment u ankua për dhimbje në krah dhe pyeti stafin nëse një ndjesi e tillë ishte normale. Në orën 19:46, perdja u ul, për t'u ngritur sërish tri minuta më vonë, pasi rregullorja e burgjeve në Tennessee kërkon aplikimin e një doze të dytë të pentobarbitalit nëse i dënuari nuk ndërron jetë pas dozës së parë. Pas injektimit të dozës së dytë, Pike filloi të lëshojë tinguj që i ngjanin gërhitjes, ndërkohë që vazhdonte të merrte frymë normalisht, një situatë që vazhdoi për afro një orë. Avokati mbrojtës, Randy Spivey, tregoi se rreth orës 20:22 kërkoi urgjentisht qasje në telefon për të njoftuar pjesën tjetër të ekipit ligjor, duke kërkuar ndërprerjen e menjëhershme të procedurës dhe dhënien e ndihmës mjekësore. Konfirmimi për nisjen e ambulancës mbërriti rreth orës 20:50, ndërsa automjetet e emergjencës dhe zjarrfikësve arritën para dyerve të burgut në orën 21:14. Administrata e Burgjeve në Tennessee insistoi se veproi në përputhje të plotë me protokollet zyrtare, megjithëse nuk ofroi sqarime se çfarë dështoi në këtë proces. Si pasojë e kësaj ngjarjeje, guvernatori Bill Lee urdhëroi një hetim të thellë mbi procedurën dhe vendosi shtyrjen e një ekzekutimi tjetër që ishte planifikuar për muajt në vijim. Nëna e viktimës, May Martinez, e cila kishte udhëtuar deri në Nashville vetëm për të parë drejtësinë të vihej në vend, u shpreh e tronditur. “Nuk mora drejtësi për vajzën time. Kjo nuk është drejtësi për Colleen”, deklaroi ajo. Ndërkohë, ekipet mjekësore po luftojnë aktualisht për t'i shpëtuar jetën gruas që i mbijetoi dy dozave të substancës vdekjeprurëse.