Klubi katalunas këmbëngul për talentin e Ligës Premier, Flick e kërkon me çdo kusht në skuadër

Emri i Junior Kroupit vazhdon të mbetet i lartë në agjendën e transferimeve të Barcelonës. Sulmuesi 20-vjeçar i Bournemouthit ndodhet në prag të rikthimit në fushat e blerta, pasi gjatë afatit kalimtar të verës pësoi një frakturë të rëndë në këmbën e djathtë. Përveç gjigantit katalunas, shërbimet e sulmuesit francez janë vëzhguar edhe nga dy skuadrat londineze, Arsenal dhe Tottenham. Ndërkohë, drejtuesit e Bournemouthit kanë vendosur një çmim prej rreth 100 milionë eurosh për të lejuar largimin e yllit të tyre. Dëmtimi i rëndë i Kroupit ndërpreu bisedimet që kishin hyrë në fazë konkrete gjatë muajit korrik. Gjatë asaj periudhe, Barcelona kishte formuluar dy propozime zyrtare, mirëpo të dyja u hodhën poshtë nga klubi anglez pasi nuk arritën shifrën e kërkuar. Ndërhyrja kirurgjikale në fund të korrikut përfundimisht mbylli çdo mundësi transferimi për atë merkato. Interesimi i gjigantit spanjoll për Kroupin lindi si alternativë pas ngërçit në negociatat për Julian Alvarez. Drejtori sportiv Deco dhe kreu i stafit teknik, Hansi Flick, kishin dhënë dritën jeshile për profilin e francezit, ndonëse pengesa financiare nga Anglia ka qenë e pranishme që në hapat e parë. Gjatë edicionit 2025/26 në Ligën Premier, Kroupi shkëlqeu me 13 gola në 33 paraqitje. Ky rendiment fantastik e shndërroi atë në adoleshentin me numrin më të madh të golave në sezonin debutues në elitën angleze, duke e rritur vlerën e tij në treg në rreth 70 milionë euro. Pozita e Bournemouthit në bisedime mbetet jashtëzakonisht e fortë, falë kontratës që lojtari ka e cila skadon më 30 qershor 2030. Kjo situatë i jep klubit luksit që të mos pranojë oferta nën pretendimet e tyre financiare. Pas frakturës pësuar në fazën përgatitore dhe operacionit të suksesshëm në fund të korrikut, francezi është drejt rikuperimit total. Sinjalet e fundit tregojnë se rikthimi i tij në aksion pritet të ndodhë rreth javës së parë të nëntorit, duke i dhënë fund një mungese tremujore.