Afrim mes Shkupit dhe Sofjes, vizita e Ursula von der Leyen nxit iniciativën e re për dialog dypalësh

Vizita e Presidentes së Komisionit Evropian, Ursula von der Leyen, në kryeqytetin e Maqedonisë së Veriut ka sjellë zhvillime konkrete në drejtim të zhbllokimit të marrëdhënieve me Bullgarinë, duke paralajmëruar takime zyrtare qysh javën e ardhshme. Kryeministri Hristijan Mickoski njoftoi se gjatë bisedimeve ka marrë sugjerimin e duhur për të ndërmarrë hapa konkretë. "Nga Presidentja mora këshillë që javën e ardhshme, ministri ynë i Jashtëm do të jetë në Sofje për Korridorin 8 dhe projektet në kuadër të Korridorit 8, të kërkojmë nga Sofja takim bilateral. Unë menjëherë kërkova nga ministri të dërgojë notë diplomatike dhe të kërkojë takim me kolegen e tij dhe të fillojë procesi prej diku", u shpreh kreu i ekzekutivit maqedonas. Mickoski gjithashtu i bëri thirrje zyrtarit të lartë evropian që Brukseli të ketë një rol më aktiv ndërmjetësues dhe garues në këtë proces. "Unë theksova që presim që edhe BE-ja të përfshihet në këtë proces. Nuk kërkojmë nga unioni që të marrë anë. Kërkojmë që të ndihmojë në krijimin e kushteve për zgjidhje evropiane që të qëndrueshme në të cilën ajo që do të dakordohemi do të ketë të qartë, detyrimet do të vlejnë për të gjithë kurse procesi i anëtarësimit nuk do të jetë sërish i hapur për kushtëzime të reja bilaterale. Çdo zgjidhje duhet të ofrojë siguri se me plotësimin e saj mbyllet një fazë dhe hapet rruga për fazën tjetër pa hapësirë për interpretime të reja ose kërkesa plotësuese", deklaroi ai. Nga ana e saj, Ursula von der Leyen vlerësoi lart ecurinë e Agjendës së reformave, por theksoi se ndryshimet kushtetuese mbeten kusht i pashmangshëm përpara. "Maqedonia e Veriut ka bërë që Plani i rritjes të jetë shumë i suksesshëm dhe kjo është gjithashtu falë meritës dhe angazhimit tuaj personal. Ju tashmë keni marrë 140 milion euro dhe pagesa të tjera do të bëhen javët e ardhshme. Progresi është mbresëlënës. Mbetet edhe një hap kyç që duhet ta ndërmerrni që të vazhdoni përpara dhe të hapni kapitujt e negociatave. E di se është çështje e ndjeshme. Por, gjithashtu dua të jem shumë e qartë se çfarë është BE-ja. Ne mirëpresim Maqedoninë e Veriut me identitetin dhe gjuhën e saj. Ne besojmë se gjuha dhe kultura maqedonase vetëm mund ta bëjnë unionin më të pasur", theksoi numri një i Komisionit Evropian. Gjatë fjalës së saj, ajo paralajmëroi se javën e ardhshme do të prezantohet strategjia e re e BE-së, e cila parashikon rivlerësimin e institucioneve, politikave dhe buxhetit para zgjerimit, ndërkohë që do të publikohet edhe udhërrëfyesi për shtetet që po avancojnë fuqishëm në negociata, si Shqipëria, Mali i Zi, Ukraina dhe Moldavia. "Kemi të ashtuquajturën udhërrëfyes për ato vende që janë thellë në procesin negociuese dhe hapjen e mbylljen e kapitujve. Në momentin që do ta kemi zhbllokuar situatën këtu, mendimi im personal është që ne mund të jemi shumë të shpejtë me Maqedoninë sepse ne po punojmë veçmë për reformat e nevojshme. Ka akoma punë për të bërë, por është mbresëlënëse ajo që keni bërë deri më tani", shtoi ajo. Gjatë qëndrimit të saj në Shkup, ku po zhvillon turnejun e saj të gjashtë radhazi në rajon duke përfshirë edhe Shqipërinë, Kosovën e Malin e Zi, Von der Leyen zhvilloi takime edhe me Presidenten Gordana Siljanovska Davkova dhe inspektoi nga afër punimet për ndërtimin e Korridorit 8.