Vllaznia nis aventurën e re, hungarezi Csaba Laszlo merr drejtimin e stolit shkodran

Klubi i futbollit Vllaznia ka zyrtarizuar këtë të mërkurë emërimin e trajnerit të ri, hungarezit 62-vjeçar Csaba Laszlo, i cili do të udhëheqë skuadrën në këtë fazë të sezonit. Nëpërmjet një njoftimi të publikuar në rrjetet zyrtare, drejtuesit e klubit kuqeblu i kanë uruar mirëseardhjen teknikut të ri, duke vënë theksin te CV-ja e tij e pasur ndërkombëtare dhe trofeut e fituara ndër vite. “Eksperiencë ndërkombëtare nga Bundesliga, Skocia, Belgjika, Hungaria dhe drejtimi i dy Kombëtareve. Trajneri i Vitit në Skoci, Trajneri i Vitit në Hungari. Eksperiencë. Personalitet. Ambicie. Një kapitull i ri fillon në Shkodër. Mirë se erdhe, Mister!”, – thuhet në mesazhin mirëseardhës të klubit nga Shkodra. Ky ndryshim në krye të pankinës vjen menjëherë pas ndërprerjes së bashkëpunimit me trajnerin Edi Martini, një vendim i marrë pas startit jo të kënaqshëm të shkodranëve në këtë edicion futbollistik, duke bërë që lëvizja në stol të jetë e pashmangshme. Gjatë karrierës së tij të gjatë, Laszlo ka drejtuar përfaqësueset kombëtare të Hungarisë dhe Ugandës, ndërsa në arenën e klubeve ka drejtuar formacione të njohura si Sepsi në Rumani, Ferencvarosh apo edhe skuadrën skoceze Dundee United.