Aksident i rëndë në Shkup: Përplaset makina e policisë, plagosen dy persona

Një automjet zyrtar i Ministrisë së Punëve të Brendshme është përfshirë në një aksident trafiku pasditen e djeshme në kryeqytet, ku si pasojë e përplasjes kanë pësuar lëndime një efektiv policie dhe një pasagjer. Sipas informacioneve zyrtare nga Policia, ngjarja ka ndodhur më 1 tetor 2026, rreth orës 15:40, në bulevardin „Aleksandari i Maqedonisë“ në Shkup. Në aksident janë përfshirë një veturë e tipit „Opel Corsa“ me targa vendase, e cila drejtohej nga shtetasi turk S.G. (23), dhe një automjet zyrtar i policisë i markës „Dacia“, që drejtohej nga zyrtari policor F.B. (33) nga Shkupi. Si pasojë e goditjes, lëndime trupore kanë pësuar drejtuesi i mjetit zyrtar F.B. dhe bashkudhëtari i tij, A.B. (45) nga fshati Batincë i Shkupit. Të lënduarit janë dërguar menjëherë për tretman mjekësor në Institutin Shëndetësor Publik „Shën Naum Ohridski“ në Shkup, ku iu është dhënë ndihma e nevojshme mjekësore. Në vendin e ngjarjes ka dalë menjëherë grupi hetues pranë SPB Shkup, i cili ka kryer ekspertizën dhe po punon për zbardhjen e plotë të rrethanave që çuan në këtë përplasje.