Nga fushat e Premier League te ringu i boksit: Ish-mbrojtësi uellsian debuton në moshën 43-vjeçare

Ish-futbollisti uellsian James Collins ka ndërmarrë një hap të papritur në karrierën e tij, duke konfirmuar debutimin në sportin e boksit në moshën 43-vjeçare. Vetë Collins, i cili gjatë karrierës së tij ka regjistruar 279 paraqitje në Premier League, do të bëjë paraqitjen e tij të parë në ring në kuadër të eventit të organizuar nga Misfits Boxing, i planifikuar për t'u mbajtur më 10 tetor në “Copper Box Arena” të qytetit të Londrës. Ish-mbrojtësi i njohur i klubeve si West Ham United dhe Aston Villa do të masë forcat me Big Stacks, një figurë e njohur e rrjeteve sociale, i cili mban nofkën “njeriu më i rrezikshëm në Britani”. Stacks vjen në këtë duel pas një triumfi të fundit ndaj Jordan McCann, ndeshje në të cilën hyri si zëvendësues i Thomas Skinner, ish-konkurrentit të shfaqjes televizive “The Apprentice”. Rrugëtimi i Collins në sportin e madh nisi te Cardiff City, ndërsa me fanellën e kombëtares së Uellsit ai ka grumbulluar 51 ndeshje, duke qenë gjithashtu pjesë e skuadrës historike që arriti deri në fazën gjysmëfinale të kampionatit evropian Euro 2016. Gjatë periudhës së tij si futbollist profesionist, uellsiani ka luajtur në finale të rëndësishme, si ajo e FA Cup me West Ham në vitin 2006 dhe finalen e League Cup me Aston Villa në vitin 2010, megjithëse në të dyja rastet nuk mundi të fitojë trofeun. Ky kalim në boks vjen disa vite pas zyrtarizimit të tërheqjes së jo nga fushat e blerta në vitin 2019, duke u bërë pjesë e një grupi të zgjeruar ish-lojtarësh që kanë vendosur të provojnë fatin e tyre mes litarëve të ringut. Reagimet mbështetëse për këtë sfidë të re nuk kanë munguar nga figura të njohura të futbollit. Ish-trajneri Sam Allardyce e ka inkurajuar përmes një mesazhi në rrjetet sociale me fjalët: “Bëje përpara, Ginge”, ndërsa ish-sulmuesi Carlton Cole ka shprehur entuziazmin e tij për këtë debutim. Përveç këtij dueli, mbrëmja e 10 tetorit do të ketë si ngjarje kryesore përballjen mes Joey Essex dhe Dapper Laughs.