Kosova lë pas zhgënjimin me Izraelin dhe starton stërvitjet për përballjen vendimtare me Austrinë

Përfaqësuesja e Kosovës nuk ka kohë për të humbur dhe as për të diskuar gjatë gabimet e ndeshjes së kaluar. Vetëm njëzet e katër orë pas barazimit pa gola kundër Izraelit, grupi ka zbritur sërish në fushë për të nisur përgatitjet intensive për sfidën e radhës në kuadër të Ligës e Kombeve, ku rival do të jetë Austria. Në duelin e zhvilluar në Debrecen, i cili u mbyll me shifrat 0:0, loja e "Dardanëve" nuk arriti të përmbushte pritshmëritë e larta. Ekipi shfaqi mungesë rrjedhshmërie në fazën sulmuese dhe pati vështirësi të dukshme në ndërtimin e rasteve për shënim, ndërkohë që në disa raste kritike u shpëtua nga ndërhyrjet vendimtare të portierit Amir Shaipi. Megjithatë, kapitulli i Hungarisë tashmë është mbyllur dhe fokusi i plotë është zhvendosur te sfidë e radhës. Nën drejtimin e përzgjedhësit Franco Foda, skuadra ka hapur dyert e stërvitjeve për ndeshjen e së dielës që do të luanë në stadiumin “Fadil Vokrri”. Qëllimi kryesor i përfaqësueses është reflektimi dhe shfaqja e një fytyre krejtësisht tjetër para publikut vendas, krahasuar me paraqitjen e zbehtë në tokën hungareze. Edhe vetë futbollistët kanë theksuar nevojën për një kthesë të shpejtë psikologjike dhe përqendrim maksimal te detyra e radhës. Mesfushori Leon Avdullahu, pas përfundimit të takimit me izraelitët, bëri të qartë se e gjithë vëmendja tashmë i kushtohet përgatitjeve taktike përballë austriakëve. Përballja e së dielës pritet të zhvillohet në rrethana të tjera, ndonëse Kosova e njeh mirë kundërshtarin, pasi u ndesh me të vetëm një javë më parë. Situata në Grupin B3 e gjen Austrinë në krye të renditjes me shtatë pikë, ndërsa Kosova renditet më poshtë me katër pikë të grumbulluara nga tri ndeshje. Ndeshja e ardhshme në Prishtinë shërben si mundësia ideale për "Dardanët" që të korrigjojnë hapat e gabuar, të lënë pas ndeshjen e Debrecenit dhe të rikthehen te rezultatet pozitive dhe loja bindëse përpara tifozëve të tyre.